Lionel Messi បានបង្ហាញភាពមិនប្រាកដប្រជាថា នឹងបន្តលេងបាល់ទាត់រយៈពេលយូរប៉ុណ្ណាទៀត ខណៈលោកបានបង្ហោះសារដ៏រំជួលចិត្ត ដើម្បីគោរពដល់ឪពុកលោក Jorge Messi ដែលបានទទួលមរណភាព។

ឪពុករបស់ Messi លោក Jorge បានទទួលមរណភាពក្នុងវ័យ ៦៨ ឆ្នាំ កាលពីសប្តាហ៍មុន បន្ទាប់ពីមានជំងឺអស់រយៈពេលជាយូរ។

Jorge បានធ្វើជាភ្នាក់ងាររបស់ Messi តាំងពីកីឡាករអាហ្សង់ទីនរូបនេះមានអាយុត្រឹម ១៤ ឆ្នាំ និងបាននៅក្បែររូបគេរហូតដល់ក្លាយជាកីឡាករដ៏អស្ចារ្យម្នាក់ក្នុងប្រវត្តិសាស្ត្របាល់ទាត់។

Messi ដែលឈ្នះពាន Ballon d'Or ៨ លើក បានសរសេរនៅលើបណ្ដាញសង្គមថា៖ «ខ្ញុំមិនដឹងថា ខ្ញុំនឹងធ្វើដូចម្តេច បើគ្មានឪពុកទៀត។ ខ្ញុំមិនដឹងថា ត្រូវបន្តទៅមុខយ៉ាងដូចម្តេចទេ។ ពីមុន ខ្ញុំគ្រាន់តែលេងបាល់ទាត់ ហើយពេលនេះ ខ្ញុំពិតជាមិនប្រាកដថា ខ្ញុំនឹងបន្តលេងបានយូរប៉ុណ្ណាទៀតឡើយ»។

Messi បានបន្តរំលឹកពីទំនាក់ទំនងដ៏ជិតស្និទ្ធជាមួយឪពុករបស់លោកថា Jorge បាននៅក្បែរលោកតាំងពីដើមដំបូងនៃអាជីព ហើយអ្នកទាំងពីរបានឆ្លងកាត់ដំណើរជីវិត និងអាជីពជាច្រើនជាមួយគ្នា។

បន្ទាប់ពី Messi បង្ហោះសារដ៏រំជួលចិត្តរំលឹកដល់ឪពុករបស់ខ្លួន Cristiano Ronaldo ក៏បានផ្ញើសារលើកទឹកចិត្តទៅកាន់មិត្តរួមអាជីពរបស់ខ្លួនផងដែរដោយសរសេរថា៖ «សូមផ្ញើការឱបដ៏កក់ក្តៅមួយទៅកាន់អ្នក និងក្រុមគ្រួសារ ក្នុងគ្រាដ៏លំបាកនេះ Leo»។

ចំណែក David Beckham អតីតកីឡាករជម្រើសជាតិអង់គ្លេស និងជាសហម្ចាស់ក្លិប Inter Miami បានបង្ហោះសារថា៖«ពួកយើងនៅជាមួយអ្នក និងក្រុមគ្រួសាររបស់អ្នកជានិច្ច Leo»៕ អត្ថបទ៖នាង សុភាវុធ