​បាល់ទាត់៖ ​គ្រូ​បង្វឹក​ក្រុម​ជំរើសជាតិ U23 ហ្វីលីពីន​លោក Norman Fegidero បាន​ចាត់​ទុក​លទ្ធផល​ស្មើ ០-០ ទល់នឹង​ក្រុមម្ចាស់ផ្ទះ​វៀតណាម​ថា​ជា​ជ័យជម្នះ​សំរាប់​ក្រុម​របស់លោក​។​

​​បន្ទាប់ពី​យកឈ្នះ​ទី​ម័​រ ៤-០ ប្រកួត​ដំបូង​វិញ្ញាសា​បាល់ទាត់​ក្នុង​ពូ​ល A នៃ​ព្រឹត្តិការណ៍​កីឡា​ស៊ី​ហ្គេម​លើក​ទី៣១ នៅ​ប្រទេស​វៀតណាម ក្រុម​របស់លោក Fegidero បានបញ្ចប់​ដោយ​លទ្ធផល​ស្មើគ្នា ០-០ ទល់នឹង​ក្រុម​ម្ចាស់ផ្ទះ​វៀត​ណាម​ម្សិលមិញ​។ ​លោក Nornam Fegidero បាន​បន្តថា ​វៀតណាម​ជា​ក្រុម​ការពារ​មេដាយមាស ពួកគេ​មានប្រៀប​ខ្លាំង​ក្នុងការ​ប្រកួត តែ​លោក​ក៏​សូម​កោតសរសើរ​កូនក្រុម​របស់លោក ​ដែល​ការពារ​រហូត​បាន​មួយ​ពិន្ទុ​ពី​ក្រុម​ម្ចាស់ផ្ទះ​។ ​​ចំណែក​គ្រូបង្វឹក​វៀតណាម​លោក Park Hang-seo មិន​សប្បាយចិត្ត​ឡើយ​ចំពោះ​លទ្ធផល​នេះ និង​បាន​កោតសរសើរ​ខ្សែការពារ​ហ្វីលីពីន​ផងដែរ ខណៈ​ក្រុម​របស់លោក​ក៏មាន​ចំនុច​ខ្វះខាត​ច្រើន​ដែរ​។

​​ក្រោយ​លេង​ពីរ​ប្រកួត​ហ្វីលីពីន​ឈរលើ​គេ​ក្នុង​ពូ​ល A នេះ​មាន ៤ពិន្ទុ​ដូចគ្នា​នឹង​វៀតណាម ​ខណៈ​មី​យ៉ាន់​ម៉ា​ឈរ​លេខ៣ មាន ៣ពិន្ទុ​។ ​​U23 មី​យ៉ាន​ម៉ា​ទើប​ចាប់ផ្តើម​ប្រកួត​ដំបូង​របស់ខ្លួន​ម្សិលមិញ ​ដោយបាន​យកឈ្នះ​ទី​ម័​រ ៣-២ ប្រផិតប្រផើយ​។ ​​បន្ទាប់ពី​ការនាំ​មុខ​ពីរ​គ្រាប់​មុន​របស់​មី​យ៉ាន់​ម៉ា​នៅក្នុង​វគ្គ​ទី១ ក្រុមទី​ម័​រ​ក៏​តាម​ស្មើ​វិញ​ពីរ​គ្រាប់​នៅ​វគ្គ​ទី២ មុន​ពេលដែល​គ្រាប់​បាល់​ជ័យជម្នះ​របស់​មី​យ៉ាន់​ម៉ា​សំរេចបាន​នៅ​នាទី​ទី៩០+៥ ទៅហើយ​ដោយ Aung Wunna Soe​។ ​​ប្រកួត​បន្ទាប់​នៅ​ថ្ងៃទី១០ ស្អែក​នេះមី​យ៉ាន់​ម៉ា​ជួប​ហ្វីលីពីន និង​ឥណ្ឌូនេស៊ីជួប​ទី​ម័​រ​ដែល​មិនទាន់មាន​ពិន្ទុ​រាប់​ដូចគ្នា​៕

​អត្ថបទ​៖​នាង សុភា​វុ​ធ