(សៀមរាប)៖ វិទ្យាស្ថានជាតិពហុបច្ចេកទេសអង្គរ បានចូលរួមយ៉ាងសកម្មក្នុងការអនុវត្តកម្មវិធីបណ្តុះបណ្តាលបច្ចេកទេស និងវិជ្ជាជីវៈ ដល់យុវជនមកពីគ្រួសារក្រីក្រ និងគ្រួសារងាយរងហានិភ័យចំនួន ១.៥លាននាក់ ​ធ្វើឱ្យយុវជនមកពីគ្រួសារក្រីក្រ និងងាយរងហានិភ័យជិត ៣ពាន់មានជំនាញ ការងារ និងប្រាក់ចំណូលសមរម្យ។

យោងតាមរបាយការណ៍របស់វិទ្យាស្ថានជាតិពហុបច្ចេកទេសអង្គរ គិតត្រឹមថ្ងៃទី៧ ខែសីហា ឆ្នាំ២០២៦ សិស្សដែលកំពុងទទួលការបណ្តុះបណ្តាលក្នុងកម្មវិធីនេះមានចំនួន ២,៩៧១នាក់ ក្នុងនោះស្រី ៨៦៣នាក់។ ក្នុងចំណោមសិស្សទាំងនេះ មានសិស្សចំនួន ១,២៧៧នាក់ ក្នុងនោះស្រី ៣៧៦នាក់ មានការងារធ្វើរួចហើយ ខណៈសិស្សចំនួន ៤២១នាក់ ស្រី ១៣៩នាក់ កំពុងចុះកម្មសិក្សា នៅតាមសហគ្រាស និងកន្លែងការងារពាក់ព័ន្ធនឹងជំនាញដែលខ្លួនបានសិក្សា។

ជាមួយគ្នានេះ សិស្សចំនួន ១,៧៩០នាក់ ក្នុងនោះស្រី ៥១៥នាក់ បានឆ្លងកាត់ការវាយតម្លៃបញ្ចប់ការសិក្សា ដែលជាដំណាក់កាលសំខាន់មួយក្នុងការបញ្ជាក់ពីសមត្ថភាព និងជំនាញដែលទទួលបានក្រោយការបណ្តុះបណ្តាល។

កម្មវិធីបណ្តុះបណ្តាលនេះ បានផ្តល់ឱកាសដល់យុវជនដែលមានបណ្ណសមធម៌ ឬបណ្ណសមធម៌គ្រួសារងាយរងហានិភ័យ ទទួលបានការសិក្សាដោយឥតគិតថ្លៃ ព្រមទាំងប្រាក់ឧបត្ថម្ភប្រចាំខែចំនួន ២៨ម៉ឺនរៀល ដើម្បីជួយសម្រួលដល់ការចំណាយក្នុងអំឡុងពេលសិក្សា។

នៅវិទ្យាស្ថានជាតិពហុបច្ចេកទេសអង្គរ ការបណ្តុះបណ្តាលត្រូវបានអនុវត្តលើជំនាញដែលមានតម្រូវការនៅក្នុងទីផ្សារការងារ ដោយរួមមានជំនាញ ការដំឡើងបណ្តាញអគ្គិសនីក្នុងអគារ, សេវាកម្មបរិក្ខារត្រជាក់ក្នុងគេហដ្ឋាន, ការថែទាំ និងជួសជុលរថយន្ត, ការដំឡើងបណ្តាញបំពង់ទឹក, ការងារកំបោរ, សេវាកម្មកុំព្យូទ័រ, រចនាក្រាហ្វិកដោយកុំព្យូទ័រ, ការដំឡើង និងថែទាំកាមេរ៉ាសុវត្ថិភាព, ការកែច្នៃបន្លែ និងផ្លែឈើ, ធុរកិច្ចភេសជ្ជៈ និងការផលិតនំ។

ការបណ្តុះបណ្តាលជំនាញទាំងនេះ មានគោលបំណងពង្រឹងសមត្ថភាពយុវជនឱ្យមានជំនាញវិជ្ជាជីវៈពិតប្រាកដ ស្របតាមតម្រូវការទីផ្សារការងារ និងអាចយកចំណេះដឹងដែលទទួលបានទៅប្រកបមុខរបរ ឬចូលបម្រើការងារនៅតាមសហគ្រាស និងគ្រឹះស្ថាននានា។

តាមរយៈលទ្ធផលខាងលើបង្ហាញថា វិទ្យាស្ថានជាតិពហុបច្ចេកទេសអង្គរ​បានចូលរួមជាក់ស្តែងក្នុងការផ្តល់ឱកាសដល់យុវជន ជាពិសេសយុវជនមកពីគ្រួសារក្រីក្រ និងងាយរងហានិភ័យ ឱ្យទទួលបានជំនាញដោយឥតគិតថ្លៃ និងមានឱកាសឈានទៅរកការងារ និងប្រាក់ចំណូល ស្របតាមគោលនយោបាយរបស់រាជរដ្ឋាភិបាល ក្នុងការលើកកម្ពស់ការអប់រំបច្ចេកទេស និងវិជ្ជាជីវៈនៅកម្ពុជា៕