ព្រះសីហនុ៖ មន្ទីរទេសចរណ៍ និងគណៈកម្មាធិការអភិវឌ្ឍន៍ទេសចរណ៍ ក្រុមការងារបច្ចេកទេស ទេសចរណ៍ បាននិងកំពុងរៀបចំផែនការទីផ្សារទេសចរណ៍ចម្រុះ និងបង្កើតនូវយន្តការទីផ្សារ និងសកម្មភាពអាទិភាពផ្សេងៗ រួមមាន៖ កម្មវិធីពិព័រណ៍ម្ហូបអាហារ និងផលិតផលខ្មែរ ក្រោមប្រធានបទ "គាំទ្រម្ហូបខ្មែរ ថែរក្សាវប្បធម៌ជាតិ" ចាប់ពីថ្ងៃទី១៣ ដល់ថ្ងៃទី១៥ ខែឧសភា ឆ្នាំ២០២២ នៅទីលានតេជោ ស្ថិតក្នុងភូមិ៤ សង្កាត់លេខ៤ ក្រុង-ខេត្ដព្រះសីហនុ។

លោក តាំង សុចិត្ដគ្រឹះស្នា ប្រធានមន្ទីរទេសចរណ៍ខេត្ដព្រះសីហនុ បានឱ្យដឹងថា គណៈកម្មាធិការ​អភិវឌ្ឍន៍​ទេសចរណ៍ ​ក្រុមការងារបច្ចេកទេសទេសចរណ៍ បាននិងកំពុងរៀបចំផែនការ​ទីផ្សារ​ទេសចរណ៍ចម្រុះ ​និងបង្កើតនូវយន្តការទីផ្សារ ​និងសកម្មភាពផ្សេងៗ ​ដើម្បីបង្កើតផលិតផល​ទេសចរណ៍សម្បូរបែប តាមរយៈការបង្កើតព្រឹត្ដិការណ៍​ទេសចរណ៍ផ្សេងៗ ដូចជាកម្មវិធី​ពិព័រណ៍​ម្ហូបអាហារ និងផលិតផលខ្មែរ ក្រោមប្រធានបទ "គាំទ្រម្ហូបខ្មែរ ថែរក្សាវប្បធម៌ជាតិ"។

សូមបញ្ជាក់ថា នៅមន្ទីរទេសចរណ៍ខេត្ដព្រះសីហនុ កាលពីពេលថ្មីៗនេះ បាន រៀបចំកិច្ចប្រជុំ​ផ្សព្វ​ផ្សាយ​ដាក់ឱ្យប្រើប្រាស់នូវ សៀវភៅផែនការទីផ្សារទេសចរណ៍ ខេត្តព្រះសីហនុ ២០២១-២០២៥ ដែលនឹងក្លាយជាត្រីវិស័យដីមានសារៈសំខាន់​ សម្រាប់ការ​ចង្អុលបង្ហាញ​អំពី​ក្របខ័ណ្ឌទីផ្សារ និង​ការផ្សព្វផ្សាយ ធនធាន​សក្តានុពល​ទេសចរណ៍ខេត្តព្រះសីហនុ ​ក្នុងការ​ រួមចំណែកស្តារ និង​អភិវឌ្ឍន៍វិស័យទេសចរណ៍ឡើងវិញ៕អត្ថបទ៖ គង់ ប៊ុនថា