មន្រ្តីជាន់ខ្ពស់ក្រសួងពាណិជ្ជកម្ម ចាត់ទុកការនាំចូលនូវបច្ចេកវិទ្យាទំនើបៗ ស្វ័យប្រវត្តិកម្ម និងដំណោះស្រាយព្រឹត្តិកម្មឆ្លាតវៃ ជាពិសេសព្រឹត្តិការណ៍ពិព័រណ៍ឧស្សាហកម្មគ្រឿងយន្តនៅកម្ពុជា សម្រាប់កម្ពុជាឈានទៅប្រកួតប្រជែងនៅលើទីផ្សារសកល ដែលផ្អែក លើគុណភាព និងស្តង់ដារ។

ឯកឧត្តម អ៊ុ កុសល អនុរដ្ឋលេខាធិការក្រសួងពាណិជ្ជកម្ម លើកឡើងក្នុងពិធីសម្ពោធជាផ្លូវការ ពិព័រណ៍ឧស្សាហកម្មគ្រឿង យន្តកម្ពុជាអន្តរជាតិ, ពិព័រណ៍ឧស្សាហកម្មសម្លៀកបំពាក់​ និងវាយនភណ្ឌអន្តរជាតិ, ពិព័រណ៍ឧស្សាហកម្មប្លាស្ទិក កៅស៊ូ ការវេចខ្ចប់ និងបោះពុម្ភកម្ពុជាអន្តរជាតិ លើកទី១០ នៅថ្ងៃទី១៣ ខែសីហា ឆ្នាំ២០២៦ នេះថា វត្តមាននៃបច្ចេកវិទ្យានៅកម្ពុជានៅពេលនេះ នឹង ផ្តល់នូវដំណោះស្រាយជាក់ស្តែងដល់ម្ចាស់រោងចក្រ សហគ្រាសកម្ពុជា ក្នុងការកែលម្អប្រសិទ្ធភាពផលិតកម្ម ការធ្វើឲ្យប្រសើរឡើងនូវ ដំណើរការផលិត និងការគាំទ្រដល់ការអភិវឌ្ឍរោងចក្រនាពេលអនាគត។ ជារួមព្រឹត្តិការណ៍នេះ គឺបានឆ្លុះបញ្ចាំងពីសហថាមពល យ៉ាងរឹងមាំរវាងរដ្ឋ និងវិស័យឯកជន ក្នុងការលើកកម្ពស់ខ្សែច្រវាក់តម្លៃឧស្សាហកម្ម ការបង្កើតភាពប្រកួតប្រជែង និងការធ្វើពិពិធកម្ម សេដ្ឋកិច្ចកម្ពុជាឲ្យកាន់តែមានភាពធន់ និងចីរភាព។

ឯកឧត្តមបន្តថា ភាពធន់នៃសេដ្ឋកិច្ចជាតិ និងភាពជោគជ័យនៃគោលនយោបាយលើការបើកទីផ្សារថ្មី ទន្ទឹមនឹងការរក្សា ទីផ្សារចាស់ និងការធ្វើពិពិធកម្មទីផ្សារផលិតផលកម្ពុជា បានធ្វើឱ្យកំណើនដ៏រឹងមាំ ដែលកើតឡើងស្របពេលដែលមានសារសំខាន់ បំផុត ខណៈពេលដែលប្រទេសកម្ពុជាកំពុងត្រៀមខ្លួនជាយុទ្ធសាស្ត្រ ដើម្បីចាកចេញពីឋានៈជាប្រទេសអភិវឌ្ឍន៍តិចតួច (LDC) នៅ ឆ្នាំ២០២៩ ខាងមុខ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា លើកឡើងផងដែរថា ព្រឹត្តិការណ៍ដ៏មានសារៈសំខាន់នេះ គឺជា វេទិកាដ៏មានតម្លៃសម្រាប់ជំរុញការអភិវឌ្ឍវិស័យឧស្សាហកម្ម និងពាណិជ្ជកម្មនៅកម្ពុជា ជាពិសេសលើវិស័យសំខាន់ៗដូចជា គ្រឿង យន្ត សម្លៀកបំពាក់ និងវាយនភណ្ឌ ផ្លាស្ទិក កៅស៊ូ ការវេចខ្ចប់ និងការបោះពុម្ព ដែលសុទ្ធតែមានតួនាទីសំខាន់ក្នុងសកម្មភាព ផលិតកម្ម និងការអភិវឌ្ឍសេដ្ឋកិច្ចជាតិ។      អ្នកឧកញ៉ាជឿជាក់ថា ពិព័រណ៍នេះនឹងក្លាយជាឱកាសដ៏ល្អសម្រាប់ធុរជន និងវិនិយោគិន ក្នុងការស្វែងរកឱកាសវិនិយោគ បង្កើតកិច្ចសហប្រតិបត្តិការ ពង្រឹងទំនាក់ទំនងអាជីវកម្ម និងពង្រីកខ្សែច្រវាក់ផ្គត់ផ្គង់ ហើយនឹងជួយ ឲ្យវិស័យឧស្សាហកម្មកម្ពុជា កាន់តែមានសមត្ថភាពប្រកួតប្រជែង និងមានភាពរឹងមាំបន្ថែមទៀត។

អ្នកឧកញ៉ាលើកទឹកចិត្តដល់សមាជិក-សមាជិកា នៃសភាពាណិជ្ជកម្មកម្ពុជា ក្រុមហ៊ុន សហគ្រាស ធុរជន និងភាគីពាក់ព័ន្ធ ទាំងអស់ សូមចូលរួមប្រើប្រាស់ឱកាសដ៏មានតម្លៃនេះ ដើម្បីស្វែងរកដៃគូអាជីវកម្មថ្មីៗ និងបទពិសោធន៍ថ្មីៗ ព្រមទាំងស្វែងរកទីផ្សារ ថ្មីៗ សម្រាប់ពង្រីកអាជីវកម្មរបស់ខ្លួននាពេលបច្ចុប្បន្ននិងអនាគត។ សភាពាណិជ្ជកម្មកម្ពុជា ដែលជាតំណាងវិស័យឯកជន តែងតែ ការពារផលប្រយោជន៍ស្របច្បាប់របស់វិស័យឯកជន ព្រមទាំងជាស្ពានរវាងវិស័យឯកជន និងរាជរដ្ឋាភិបាល និងស្ថាប័នពាក់ព័ន្ធ ដើម្បីលើកកម្ពស់បរិយាកាសវិនិយោគ និងការវិនិយោគនៅកម្ពុជា៕

អត្ថបទ៖ សុន រ៉ាឌី