ភ្នំពេញ៖ នៅថ្ងៃទី១៣ ខែសីហា ឆ្នាំ២០២៦ អ្នកនាំពាក្យកងរាជអាវុធហត្ថលើផ្ទៃប្រទេស បានប្រកាសស្វែងរកបុគ្គលម្នាក់ដែលមានឈ្មោះ ប៉េង ជីវ៉ា មានភិនភាគដូចរូបភាព ដោយអ្នកនាំពាក្យកងរាជអាវុធហត្ថលើផ្ទៃប្រទេសបញ្ជាក់ថា បុគ្គល ប៉េង ជីវ៉ា ពុំមានឈ្មោះក្នុងបញ្ជីគ្រប់គ្រងរបស់កងរាជអាវុធហត្ថឡើយ។

អ្នកនាំពាក្យកងរាជអាវុធហត្ថលើផ្ទៃប្រទេសបានអំពាវនាវឱ្យសាធារណជន និងអ្នកសារព័ត៌មានជួយផ្តល់ព័ត៌មានបន្ថែមដល់កងរាជអាវុធហត្ថ ដើម្បីធ្វើការស៊ើបអង្កេតស្រាវជ្រាវតាមនីតិវិធី។

ការប្រកាសរបស់អ្នកនាំពាក្យកងរាជអាវុធហត្ថលើផ្ទៃប្រទេស បានធ្វើឡើងបន្ទាប់ពីមានការផ្សព្វផ្សាយតាមបណ្ដាញសង្គមថា បុគ្គលឈ្មោះ ប៉េង ជីវ៉ា រស់នៅភូមិចាក់ខ្លាញ់ ឃុំពាមរក៍ ស្រុកពាមរក៍ ខេត្តព្រៃវែង ពុំមានមុខរបរ និងតួនាទីអ្វីឱ្យពិតប្រាកដនោះទេ តែបុគ្គល ប៉េង ជីវ៉ា នេះ បានប្រើប្រាស់ឯកសណ្ឋានយោធា ឯកសណ្ឋានកងរាជអាវុធហត្ថ និងយកឈ្មោះថ្នាក់ដឹកនាំទៅប្រើ ដើម្បីឱ្យគេជឿទុកចិត្តថា ខ្លួនគេ គឺជាអ្នកធ្វើការពិតប្រាកដ តែតាមពិតជាល្បិចបោកប្រាស់របស់បុគ្គលឈ្មោះ ប៉េង ជីវ៉ា ដើម្បីផលប្រយោជន៍ និងធ្វើឱ្យមានប្រជាពលរដ្ឋរងគ្រោះ៕អត្ថបទ ៖ ប្រាក់ វ៉ាន់ដា