ខ្សែបម្រើរបស់ Manchester City, Tijjani Reijnders ត្រូវបានរាយការណ៍ថា ត្រៀមផ្លាស់ទៅកាន់ក្លិប Al-Qadsiah នៅក្របខណ្ឌ Saudi Pro League ក្នុងតម្លៃប្រមាណ ៥២ លានផោន។

Manchester City បានឈានដល់កិច្ចព្រមព្រៀងលើតម្លៃផ្ទេរសម្រាប់កីឡាករជម្រើសជាតិហូឡង់រូបនេះ ដែល City បានចំណាយ ៤៦.៥ លាន ដើម្បីទិញគេពី AC Milan កាលពីរដូវក្តៅមុន។

Reijnders បានចាប់ផ្តើមអាជីពនៅ City យ៉ាងល្អ ប៉ុន្តែក្រោយមកពិបាកបង្កើតឥទ្ធិពលសំខាន់ក្នុងរដូវកាលចុងក្រោយក្រោមការដឹកនាំរបស់ Pep Guardiola នៅក្លិប ដោយរកបាន ៧ គ្រាប់ ក្នុង ៤៧ ប្រកួត។

កីឡាករវ័យ ២៨ ឆ្នាំរូបនេះបានហ្វឹកហាត់ដាច់ដោយឡែកពីក្រុមធំរបស់ City កាលពីថ្ងៃព្រហស្បតិ៍ ខណៈការផ្ទេរទៅ Al-Qadsiah កំពុងខិតជិតមកដល់។ Al-Qadsiah បច្ចុប្បន្នដឹកនាំដោយអតីតអ្នកចាត់ការរបស់ Liverpool, Celtic និង Leicester City គឺលោក Brendan Rodgers។

ការចាកចេញរបស់ Reijnders អាចជាផ្នែកមួយនៃការកែប្រែទ្រង់ទ្រាយធំក្នុងតំបន់ខ្សែបម្រើរបស់ City ខណៈអនាគតរបស់ Rodri ក៏នៅមិនទាន់ច្បាស់។

Reijnders ក៏ជាសមាជិកក្រុមជម្រើសជាតិហូឡង់នៅ World Cup 2026 ដោយបានចូលលេង ៣ ប្រកួត។ គេបានចាប់ផ្តើមជម្រើសដំបូងក្នុងវគ្គសន្សំពិន្ទុជួបជប៉ុន ស៊ុយអែត និងទុយនីស៊ី ប៉ុន្តែមិនបានលេងក្នុងវគ្គ ៣២ ក្រុមចុងក្រោយទល់នឹងម៉ារ៉ុក ដែលហូឡង់ចាញ់ដោយបាល់ ១១ ម៉ែត្រកាត់សេចក្តី៕ អត្ថបទ៖នាង សុភាវុធ