​អ៊ុយក្រែន៖ យ៉ាងហោចណាស់​មនុស្ស ៤នាក់​ស្លាប់ និង ៨នាក់​បាន​រង​របួស​នៅ​ក្នុង​តំបន់ Donetsk កាលពី​ថ្ងៃ​អាទិត្យ បន្ទាប់ពី​ការវាយប្រហារ​បាន​ធ្វើ​ឡើង​ដោយ​កងកម្លាំង​រុស្ស៊ី​។​

​យោង​តាម​ប្រមុខ​រដ្ឋាភិបាល​តំបន់ Donetsk លោក Pavlo Kyrylenko បាន​ឲ្យ​ដឹង​ថា ប្រជាជន​អ៊ុយ​ក្រែ​ន​ជាច្រើន​ភ័យខ្លាច​ការ​បាត់​បង់ជីវិត​កាលពី​ថ្ងៃអាទិត្យ ​បន្ទាប់ពី​គ្រាប់បែក​រុស្ស៊ី​បាន​ផ្ទុះ​នៅ​សាលារៀន​មួយ​កន្លែង​ ជា​កន្លែង​ដែល​មនុស្ស​ប្រមាណ ៩០​នាក់​កំពុង​ជ្រកកោន​នៅ​ក្នុង​បន្ទប់​ក្រោម​ដី​។ យោង​តាម​អភិបាលខេត្ត Luhansk បាន​ឱ្យ​ដឹង​ថា ក្រុម​សង្គ្រោះ​បន្ទាន់​បាន​រក​ឃើញ​សាកសព ២​នាក់ និង​បាន​ជួយសង្គ្រោះ​មនុស្ស​ចំនួន ៣០​នាក់​នៅ​សាលារៀន​នៅ​ក្នុង​ភូមិ Bilohorivka បន្ទាប់​ពី​ការ​ទម្លាក់​គ្រាប់បែក​កាលពី​ថ្ងៃ​សៅរ៍​។​ ​យោធា​អ៊ុយ​ក្រែ​ន​បាន​និយាយ​ថា ទីក្រុង​មូ​ស្គូ​កំពុង​ផ្តោត​លើ​កិច្ច​ខិតខំ​ប្រឹងប្រែង​សំខាន់​របស់​ខ្លួន​ លើការបំផ្លាញ​ហេដ្ឋារចនាសម្ព័ន្ធ​អាកាសយានដ្ឋាន​នៅ​ភាគ​ខាងកើត និង​ភាគ​ខាង​ត្បូង​ប្រទេស​អ៊ុយ​ក្រែ​ន​។

​ប្រធានាធិបតី​អ៊ុយ​ក្រែ​ន​លោក Volodymyr Zelenskyy និង​មេដឹកនាំ​ផ្សេងទៀត​បាន​ព្រមានកាលពីប៉ុន្មាន​ថ្ងៃ​ថ្មីៗ​នេះ​ថា ការវាយប្រហារ​របស់​រុស្ស៊ី​នឹង​កាន់តែខ្លាំង​ឡើង​រហូតដល់​ថ្ងៃទី9 ឧសភា នៅពេលដែល​រុស្ស៊ី​ប្រារព្ធ​ទិវា​ជ័យជំនះ ហើយ​នៅក្នុង​ទីក្រុង​មួយចំនួន​បានប្រកាស​បម្រាម​គោចរ ឬ​ព្រមានប្រជាជន​ពី​ការ​ប្រមូលផ្តុំ​នៅ​ទី​សាធារណៈ​។​ ​ប្រធានាធិបតី​រុស្ស៊ីលោក Vladimir Putin ត្រូវ​បាន​គេ​ជឿ​ថា ​មានបំណង​ប្រកាស​ពី​ជ័យជម្នះមួយចំនួន​នៅ​អ៊ុយ​ក្រែ​ន នៅពេល​លោក​ថ្លែង​ទៅកាន់​កងទ័ព​នៅ​ទីលាន​ក្រហម​នៅ​ថ្ងៃ​ចន្ទ​នេះ៕

អត្ថបទ៖ ប៊ុនថន