ទីភ្នាក់ងារភូគព្ភសាស្ត្រ BMKG របស់ប្រទេស បាននិយាយថា រញ្ជួយដីកម្រិត ៧,៧ រ៉ិចទ័រ និងការរញ្ជួយជាបន្តបន្ទាប់បានវាយប្រហារឆ្នេរសមុទ្រភាគខាងកើតប្រទេសឥណ្ឌូនេស៊ីនៅព្រឹកថ្ងៃសៅរ៍ ទី ១៥ ខែសីហានេះ ខណៈរលកយក្សស៊ូណាមិ មានកម្ពស់តិចជាង១ម៉ែត្រ ត្រូវបានកត់ត្រានៅក្នុងតំបន់ជាច្រើន ហើយនៅក្នុងគ្រោះមហន្តរាយនេះបណ្តាលឲ្យមនុស្ស២នាក់បានស្លាប់។

នៅកំពង់ផែមួយកន្លែងក្នុងក្រុង Maumere តំបន់ Sikka Regency លើកោះ Flores ភាគខាងកើតប្រទេសឥណ្ឌូនេស៊ី អគារមួយត្រូវបានគេមើលឃើញបាក់រលំ ខណៈមនុស្សជាច្រើនស្រែក និងបានរត់នៅតាមដងផ្លូវ។

មជ្ឈមណ្ឌល EMSC បានកត់ត្រាការរញ្ជួយដីមានកម្រិត ៧,៧ រ៉ិចទ័រនៅម៉ោងប្រហែល ៤:៥៨ ព្រឹកម៉ោងក្នុងស្រុក នៅឆ្នេរសមុទ្រប្រទេសឥណ្ឌូនេស៊ី នៅថ្ងៃទី ១៥ ខែសីហានេះ។

នៅកន្លែងផ្សេងទៀត ប្រជាជនបានប្រញាប់ប្រញាល់ចាកចេញពីលំនៅឋានរបស់ពួកគេបន្ទាប់ពីរញ្ជួយដី ដែលត្រូវបានគេគិតថាមានរយៈពេលប្រហែលមួយនាទីនៅក្នុងតំបន់ជាច្រើន នេះបើយោងតាមអ្នកនាំពាក្យរបស់ទីភ្នាក់ងារគ្រោះមហន្តរាយជាតិ លោក Dodi Yuleova ។