ហ្វីលីពីន៖ មណ្ឌលបោះឆ្នោតជាច្រើនកន្លែងបានបើកនៅទូទាំងប្រទេសនៅថ្ងៃចន្ទនេះ សម្រាប់ការបោះឆ្នោតថ្នាក់តំបន់ ខេត្ត និងថ្នាក់ជាតិនៅក្នុងប្រទេសហ្វីលីពីន។ យោងតាមគណៈកម្មកាបោះឆ្នោតបានឲ្យដឹងថា មានអ្នកបោះឆ្នោតដែលបានចុះឈ្មោះប្រមាណ ៦៥.៧លាននាក់នៅក្នុងប្រទេស និងមានអ្នកចុះឈ្មោះនៅក្រៅប្រទេស ១.៦៩លាននាក់។
ប្រជាជនហ្វីលីពីនអាចទៅបោះឆ្នោតចាប់ពីម៉ោង ៦ព្រឹកដល់ម៉ោង ៧ល្ងាចដើម្បីបោះឆ្នោតជ្រើសរើសមេដឹកនាំថ្មី រួមមានប្រធានាធិបតី អនុប្រធានាធិបតី ព្រឹទ្ធសភា សមាជិកសភាជាន់ទាប និងមន្ត្រីថ្នាក់តំបន់ និងខេត្ត។ អ្នកទៅបោះឆ្នោតនិយាយថា យើងពិតជារំភើបព្រោះការបោះឆ្នោតនេះមានសារៈសំខាន់ ខណៈយើងជ្រើសរើសមេដឹកនាំថ្មីរបស់ប្រទេស។ អ្នកបោះឆ្នោតបាននិយាយនៅខាងក្រៅស្ថានីយ៍បោះឆ្នោតក្នុងតំបន់ Makati ទីក្រុងម៉ានីលថា លោកគិតថា អ្នកដែលលោកបោះឆ្នោតឲ្យនឹងផ្លាស់ប្តូរទៅរកប្រព័ន្ធថ្មី។ វាពិតជាសំខាន់ក្នុងការបោះឆ្នោត ព្រោះមានអ្នកនយោបាយពុករលួយជាច្រើនចាំបាច់ត្រូវដកចេញពីតួនាទីរបស់ពួកគេ។
អ្នកទទួលជ័យជម្នះក្នុងការបោះឆ្នោតនៅថ្ងៃចន្ទនេះ នឹងឡើងកាន់តំណែងនៅថ្ងៃទី៣០ ខែមិថុនាក្នុងអាណត្តិរយៈពេល ៦ឆ្នាំ ហើយនឹងត្រូវប្រឈមបញ្ហាធំៗជាច្រើន រួមមានសេដ្ឋកិច្ចដែលញាំញីដោយជំងឺរាតត្បាត ភាពក្រីក្រខ្លាំងរបស់ប្រជាជន និងបញ្ហានៅសេសសល់ នៃការបង្ក្រាបការប្រយុទ្ធប្រឆាំងគ្រឿងញៀនដ៏ឃោរឃៅ ដឹកនាំដោយមេដឹកនាំដែលនឹងចាកចេញពីតំណែងលោក Rodrigo Duterte៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
