រដ្ឋលេខាធិការក្រសួងពាណិជ្ជកម្ម លើកទឹកចិត្តដល់វិស័យឯកជន បង្កើននូវផលិតភាព គុណភាព និងភាពទាក់ទាញនៃផលិតផល និងមានភាពអនុលោម ដើម្បីពង្រឹងភាពប្រកួតប្រជែង និងពង្រីកទីផ្សារទាំងក្នុងនិងក្រៅប្រទេស សម្រាប់ភាពជោគជ័យក្នុងអាជីវកម្ម និងចូលរួមជំរុញកំណើនសេដ្ឋកិច្ចជាតិប្រកបដោយចីរភាព។

  ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម លើកឡើងនៅក្នុងកិច្ចពិភាក្សា ស្តីពីពង្រឹងការតភ្ជាប់ពាណិជ្ជកម្ម វិនិយោគ និងភស្តុភារកម្ម៖ អភិវឌ្ឍវិស័យឯកជន និងជំរុញការធ្វើពិពិធកម្មផលិតផលជាតិ នៅរសៀលថ្ងៃទី១៤ ខែសីហា ឆ្នាំ២០២៦ ថា ក្រសួងពាណិជ្ជកម្មកំពុងបន្តអនុវត្ត កែទម្រង់ និងធ្វើសាមញ្ញាកម្មសេវាសាធារណៈ ដើម្បីបង្កើនប្រសិទ្ធភាព និងភាពងាយស្រួល សម្រាប់ធុរជន និងអ្នកពាក់ព័ន្ធ ជាពិសេសេវាចុះបញ្ជីពាណិជ្ជកម្ម ចុះបញ្ជីម៉ាក ការចេញវិញ្ញាបនបត្របញ្ជាក់ដើមកំណើតទំនិញ ការតម្កល់ខិតជូនដំណឹង នៃប្រតិបត្តិការដែលមានកិច្ចធានាជាដើម។ ទាក់ទងផលិតផលវិញ, ក្រសួងពាណិជ្ជកម្មបានដាក់ចេញជាបន្ត បន្ទាប់ ដើម្បីជំរុញការប្រើប្រាស់ផលិតផលក្នុងស្រុក លើកកម្ពស់គុណភាព និងតម្លៃបន្ថែមផលិតផល ពង្រឹងការតភ្ជាប់ទីផ្សារ និង ពង្រីកឱកាសនាំចេញផលិតផលកម្ពុជា។

 ឯកឧត្តម បន្តថា ទាក់ទងទីផ្សាររបស់កម្ពុជានេះ ការនាំចេញរបស់កម្ពុជាបាននិងកំពុងបន្តកំណើនគួរកត់សម្គាល់ តែទោះបី យ៉ាងណាយើងត្រូវបង្កើតឱកាសទីផ្សារឱ្យកាន់ច្រើន និងកាន់តែធំ និងធ្វើឱ្យផលិតផលរបស់យើងមានភាពទាក់ទាញបន្ថែម មិនថា កម្រិតផលិតផលកសិកម្ម ឬកម្រិតឧស្សាហកម្មណាមួយនោះទេ គឺត្រូវចូលរួមទាំងអស់គ្នាបង្កើននូវផលិតភាព គុណភាព និងបង្កើន នូវភាពទាក់ទាញគ្រប់ផលិតផលទាំងអស់។

ឧកញ៉ា គួច ផេង អនុប្រធានសភាពាណិជ្ជកម្មកម្ពុជា លើកឡើងថា កម្ពុជាគឺជាប្រទេសដែលមានសក្តានុពលធំធេង ក្នុងនោះ កិច្ចពិភាក្សាលើការតភ្ជាប់ពាណិជ្ជកម្ម វិនិយោគ និងភស្តុភារកម្មនេះពិតជាមានសារៈសំខាន់ណាស់ ដើម្បីស្វែងរកដំណោះស្រាយថ្មីៗ ក្នុងគោលដៅជំរុញការសម្រួលពាណិជ្ជកម្មរបស់កម្ពុជា ក៏ដូចជាការទាក់ទាញអ្នកវិនិយោគទាំងក្នុងនិងក្រៅប្រទេសបន្ថែម។

លោក អាកៃ លីន (Akai Lin) នាយកទទួលបន្ទុកកិច្ចការក្រៅប្រទេស លើកឡើងថា ជុំវិញការអភិវឌ្ឍឧស្សាហកម្មនៅកម្ពុជា កំពុងមានការរីកចម្រើនគួរកត់សម្គាល់ ប៉ុន្តែកម្ពុជានៅជួបបញ្ហាខ្លះៗដែលត្រូវអភិវឌ្ឍន៍ ជាពិសេសដំណោះស្រាយក្នុងឧស្សាហកម្ម ដើម្បីធ្វើពិពិធកម្មឱ្យចំគោលដៅ អាចផ្គត់ផ្គង់ខ្សែច្រវាក់ផលិតកម្ម និងការតោងថ្ពក់ទៅនិងក្រុមហ៊ុនក្រៅស្រុក ជំរុញបង្កើនខ្សែច្រវាក់ ផលិតកម្ម និងខ្សែច្រវាក់ផ្គត់ផ្គង់ឱ្យកាន់តែធំ។

សូមបញ្ជាក់ថា ជុំវិញបញ្ហាខាងលើនេះដែរ ក៏មានកិច្ចពិភាក្សា ស្តីពីពង្រឹងការតភ្ជាប់ពាណិជ្ជកម្ម វិនិយោគ និងភស្តុភារកម្ម៖ អភិវឌ្ឍ វិស័យឯកជន និងជំរុញការធ្វើពិពិធកម្មផលិតផលជាតិ ដោយវាគ្មិនមកពីក្រសួង-ស្ថាប័នពាក់ព័ន្ធ ពិភាក្សា និងស្វែងរកដំណោះស្រាយ ទាំងនៅក្នុងវិស័យសាធារណៈ និងឯកជន ដើម្បីលើកកម្ពស់ និងជំរុញការធ្វើពិពិធកម្មរបស់កម្ពុជាឱ្យចំគោលដៅទាំងទីផ្សារតំបន់ និង ពិភពលោក៕

អត្ថបទ៖ សុន រ៉ាឌី