អំឡុងសប្តាហ៍មួយក្នុងចំណោមសប្តាហ៍វិស្សមកាលដ៏មមាញឹកបំផុតរបស់ជប៉ុន ភ្លៀងកម្ពស់ ៣៦០មីលីម៉ែត្រ បានធ្លាក់ក្នុងរយៈពេល ២៤ម៉ោងកន្លងមកនេះ តាមតំបន់ជាច្រើនរបស់ខេត្ត Chiba ស្ថិតនៅជាប់នឹងទីក្រុងតូក្យូ ធ្វើឲ្យជន់លិចដងផ្លូវ និងផ្លូវរថភ្លើង ក្នុងនោះទាហានត្រូវបានដាក់ពង្រាយ ដើម្បីជួយកិច្ចខិតខំជួយសង្រ្គោះ ។

ចំនួនអ្នកស្លាប់ បានកើនឡើងដល់ ៨នាក់ បន្ទាប់ពីមានភ្លៀងធ្លាក់ខ្លាំងមិនធ្លាប់មានកាលពីពេលមុននៅក្នុងខេត្ត Chiba ។

មន្ត្រីក្នុងតំបន់បាននិយាយថា លំនៅឋានជាច្រើនខ្នងបានរងការខូចខាត ហើយភ្លៀងធ្លាក់ខ្លាំងនៅតំបន់នេះ ចាប់តាំងពីល្ងាចថ្ងៃព្រហស្បតិ៍រហូតមក ។

ក្រុមអាជ្ញាធរ បានចេញការព្រមានគ្រាអាសន្នកម្រិតទី ៥ ដែលជាកម្រិតអតិបរមាសម្រាប់ភ្លៀងធ្លាក់ខ្លាំងនៅក្នុងក្រុង និងទីប្រជុំជនចំនួន ២២នៅទូទាំងខេត្ត Chiba ។ ពួកគេនិយាយថា ចំនួនអ្នកស្លាប់រួមមានទាំងអ្នកនៅក្នុងរថយន្តមួយគ្រឿង ។

មន្ត្រីខេត្តនិយាយថា ទឹកជំនន់បានធ្វើឲ្យប៉ះពាល់ដល់លំនៅឋានយ៉ាងហោចណាស់ ១៧០ខ្នង ហើយលំនៅឋានមួយខ្នងត្រូវបានបំផ្លាញ ។

លោក Shinji Fujisawa គឺជាជាងកាត់សក់មួយរូបនិយាយថា កម្រិតទឹកភ្លៀងពិតជាខ្ពស់ខ្លាំងណាស់ ហើយលោកបានរំឭកដល់បទពិសោធន៍ស្រដៀងគ្នា កាលពីរយៈពេល ៣ឆ្នាំមុន ។

លោកនិយាយថា ការខូចខាតពេលនេះ ពិតជាអាក្រក់ខ្លាំងណាស់ ហើយព្យុះភ្លៀងជាប់កំណត់ត្រា លែងជារឿងធម្មតាទៀតហើយ៕