អភិបាលរដ្ឋហាវ៉ៃលោក Josh Green បានប្រកាសដាក់រដ្ឋក្នុងគ្រាអាសន្ន ពេលដែលព្យុះត្រូវពិក Lala ត្រូវបានព្យាករថា ខិតមកជិតតំបន់មួយចំនួននៅលើប្រជុំកោះសហរដ្ឋអាមេរិកមួយនេះ នារយៈពេលប៉ុន្មានថ្ងៃខាងមុខនេះ ។

ការព្យាករក្រាហ្វិកពីគេហទំព័រតាមដានអាកាសធាតុ Windy.com ឃើញព្យុះ Lala រំកិលទៅកាន់កោះ Big របស់រដ្ឋហាវ៉ៃ ។

សេវាកម្មអាកាសធាតុជាតិសហរដ្ឋអាមេរិក និយាយថា ព្យុះ Lala ត្រូវបានគេរំពឹងថា នឹងបង្កើនកម្លាំងរបស់វាទៅជាព្យុះសង្ឃរា ពេលដែលវានៅជិតកោះ Big ។

ការប្រកាសគ្រាអាសន្នរបស់លោក Green នឹងបញ្ចេញមូលនិធិរដ្ឋ ធនធាន និងបុគ្គលិកសម្រាប់ឆ្លើយតបព្យុះ ហើយនិងកិច្ចខិតខំស្តាឡើងវិញ បើសិនជាការខូចខាតកើតឡើង៕