ភ្នំពេញ៖ កម្ពុជានិងទីម័រ បានប្តេជ្ញាចិត្តរួមគ្នាជំរុញចលនាទេសចរណ៍រវាងកម្ពុជា និងទីម័រ និងទេសចរណ៍ផ្ទៃក្នុងអាស៊ានឡើងវិញ ក្រោយស្ថានការណ៍កូវីដ១៩ មានការធូរស្រាល។

ក្នុងជំនួបរវាងឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងឯកឧត្តម Agio Pereira ទេសរដ្ឋមន្ត្រី នៃរដ្ឋាភិបាលប្រទេស Timor-Lesteនៅទីស្តីការក្រសួង នៅថ្ងៃព្រឹកថ្ងៃទី៩ ខែឧសភានេះ ឯកឧត្តម ទ្រី ឈីវ ទីប្រឹក្សាក្រសួងទេសចរណ៍ បានថ្លែងថា កម្ពុជា និងទីម័រឡេស បានរៀបចំសេចក្តីព្រាងខ្លឹមសារអនុសារណៈនៃការយោគយល់គ្នា លើ​កិច្ច​សហប្រតិបត្តិការ​ក្នុងវិស័យទេសចរណ៍នៃប្រទេសទាំងពីររួចហើយ ។ យើងក៏កំពុងបានរកឱកាស​ដើម្បី​ចុះហត្ថលេខា​លើខ្លឹមសារអនុស្សារណៈនេះ ​ដើម្បីបើកឱកាស និង​បើកផ្លូវពង្រីក​កិច្ច​សហប្រតិបត្តិការ​ជំរុញ​ការ​អភិវឌ្ឍ​វិស័យទេសចរណ៍ និង​ជំរុញ​ចលនា​ទេសចរណ៍​រវាង​ប្រទេស​ទាំងពីរ​ឱ្យ​ល្អប្រសើរឡើងវិញ។

ក្នុងជំនួបនេះដែរ ឯកឧត្តម រដ្ឋមន្ត្រីថោង ខុន ​ក៏បានលើកឡើងដែរថា ​ទន្ទឹម​ការ​ជំរុញ​ចលនា​ទេស​ចរណ៍​ផ្ទៃក្នុងអាស៊ាន និងទីម័រនេះ ​មកដល់ពេលនេះ កម្ពុជា ក៏បានបង្កើតនូវគោលដៅ​ទេសចរណ៍​ថ្មីៗ ​និងបង្កើតផលិតផលទេសចរណ៍ថ្មីជាច្រើនកន្លែង ដែលមានប្រព័ន្ធ​ហេដ្ឋា​រចនាសម្ព័ន្ធ​ល្អ​ប្រសើរជាងមុន ​ជាពិសេសនៅគោលដៅទេសចរណ៍ខេត្តសៀមរាប​ និងខេត្តព្រះសីហនុជាដើម។

ពាក់ព័ន្ធ​នឹងការបើកប្រទេស ទទួលទេសចរអន្តរជាតិនេះដែរ ឯកឧត្តម ថោង ខុន ថ្លែងថា នៅ​ពេល​ភ្ញៀវទេសចរអន្តរជាតិ​ អញ្ជើញមកដល់ព្រំដែនកម្ពុជា គឺភាគីភ្ញៀវគ្រាន់តែធ្វើការ​បង្ហាញ​ប័ណ្ណ​ចាក់វ៉ាក់សាំងកូវីដ១៩ តែប៉ុណ្ណោះ ​ខណៈដែលកម្ពុជាក៏បានបើកធ្វើ VISA on ARRIVAL ផងដែរ​នៅ​ពេលដែលភ្ញៀវមកដល់ព្រំដែនកម្ពុជា។

នៅក្នុងជំនួបនេះ ឯកឧត្តម Agio Pereira បានគាំទ្រ​ដំណើរ​កិច្ច​សហប្រតិបត្តិការអភិវឌ្ឍ​វិស័យ​ទេសចរណ៍ ​និងជំរុញ​ចលនាទេសចរណ៍នៃប្រទេសទាំងពីរកម្ពុជា-ទីម័រ ​ហើយជាពិសេសឯកឧត្តម ក៏បានថ្លែង​អំណរគុណប្រមុខថ្នាក់ដឹកនាំ​រាជរដ្ឋាភិបាលកម្ពុជា ​ដែល​បាន​គាំទ្រប្រទេស​ទីម័រអោយ​ចូលជា​សមាជិកអាស៊ាននៅក្នុងអាណត្តិដែលកម្ពុជាកំពុងធ្វើប្រធានអាស៊ាន។

ក្នុងជំនួបនេះ ឯកឧត្តម Agio Pereira ក៏បាន​ផ្ដាំផ្ញើ​សារ​រំលែក​ទុក្ខ​ដ៏​ក្រៀមក្រំ​បំផុត​ជូន​ចំពោះ​សម្តេច​តេជោ​ ហ៊ុន សែន ខណៈសម្តេចតេជោ​ បានបាត់បង់​បង​ប្រុសជាទីស្រឡាញ់ គឺ​សម្តេច​ឧត្តមទេពញាណ ហ៊ុន ​ណែងនៅពេលថ្មីនេះផងដែរ៕ អត្ថបទ ស៊ុម សុខជា