សត្វសេះព្រៃនៅតំបន់ខ្ពង់រាប Kruzi ស្ថិតនៅជិតទីក្រុង Livno ប្រទេសបូស្នី និងនៅតំបន់ Herzegovina ពិបាកស្វែងរកទឹកផឹក ស្របពេលគ្រោះរាំងស្ងួតរយៈពេលយូរ ហើយនិងសីតុណ្ហភាពខ្ពស់ បានធ្វើឲ្យប្រភពទឹកធម្មជាតិរីងស្ងួត ។

ចំនួនសត្វសេះព្រៃដ៏ច្រើនដែលបោលទៅកាន់តំបន់ខ្ពង់រាប Kruzi ស្ថិតតាមជើងភ្នំ Cincar បានកើនឡើង ក្នុងរយៈពេល ៣០ឆ្នាំកន្លងមកនេះ ដែលភាគច្រើននៃសត្វសេះទាំងនេះ ត្រូវបានប្រលែងឲ្យចូលព្រៃដោយម្ចាស់របស់ពួកវា ពេលដែលគ្រឿងចក្រជំនួសកម្លាំងពលកម្មរបស់ពួកវានៅក្នុងកសិដ្ឋាន ។

ការបោលរបស់ហ្វូងសត្វព្រៃដ៏ច្រើនសន្ធឹកសន្ធាប់នៅតំបន់ភាគខាងលិចបូស្នីនេះដែរ បានក្លាយជាចំណុចទាក់ទាញដ៏សំខាន់មួយ សម្រាប់ភ្ញៀវទេសចរ ។

លោក Marin Mamuza គឺជាអគ្គុទេសទេសចរណ៍មួយរូបដែលបាននាំភ្ញៀវមកកម្សាន្តលេងនៅតំបន់ខ្ពស់រាបនេះ និយាយថា ភាគច្រើននៃប្រភពទឹក ១០កន្លែងនៅតំបន់ខ្ពង់រាប Kruzi បានរីងស្ងួតអស់ទំាងស្រុង ។

លោក Mamuza បន្តថា អំឡុងគ្រោះរាំងស្ងួត សេះព្រៃបានបោលស្វែងរកទឹកជាញឹកញាប់ ពីព្រោះថាទឹក គឺជាប្រភពដ៏សំខាន់សម្រាប់ការរស់រានរបស់ពួកវា ។

យោងតាមការអះអាងរបស់អ្នកតាមដានបរិយាកាសទីភ្នាក់ងារព័ត៌មានរ៉យទ័រ បានឲ្យដឹងថា សីតុណ្ហភាពមធ្យមនៅទីក្រុង Livno អំឡុងខែសីហានេះ ឈានដល់ ២៨អង្សាសេ ពោលគឺមាន ៤,៧អង្សាសេពីលើកម្រិតធម្មតា ៕