ប្រធានទីភ្នាក់ងារគ្រប់គ្រងគ្រោះមហន្តរាយជាតិ (BNPB) បាននិយាយថា យ៉ាងហោចណាស់មនុស្ស ៣៨ នាក់ បានស្លាប់ បន្ទាប់ពីមានគ្រោះរញ្ជួយដីកម្រិត ៧.៧ រ៉ិចទ័រ និងគ្រោះរញ្ជួយដីជាបន្តបន្ទាប់រាប់សិបលើក បានវាយប្រហារនៅភាគខាងកើតប្រទេសឥណ្ឌូនេស៊ី នៅថ្ងៃសៅរ៍ (ទី ១៥ ខែសីហា) នេះ ខណៈដែលក្រុមអ្នកជួយសង្គ្រោះបានប្រញាប់ប្រញាល់ជម្លៀសអ្នករស់រានមានជីវិតដែលរងរបួស និងយកសាកសពចេញពីក្រោមគំនរបាក់បែក នៅក្នុងទីក្រុង Sikka និង Maumere។

រលកយក្សស៊ូណាមិដែលមានកម្ពស់តិចជាង ១ ម៉ែត្រ (៣ ហ្វីត) ត្រូវបានកត់ត្រានៅក្នុងតំបន់ជាច្រើននៃប្រទេសអាស៊ីអាគ្នេយ៍ បន្ទាប់ពីការរញ្ជួយដីនៅព្រឹកព្រលឹមថ្ងៃនេះ។ ការព្រមានអំពីរលកយក្សស៊ូណាមិត្រូវបានលើកប្រហែលបីម៉ោងបន្ទាប់ពីរញ្ជួយដីនេះ។

លោក Fathur Rahman ប្រធានទីភ្នាក់ងារជួយសង្គ្រោះរបស់ទីក្រុង បាននិយាយថា ក្រុមអ្នកជួយ សង្គ្រោះនៅជុំវិញទីក្រុងកំពង់ផែ Maumere បានរកឃើញមនុស្ស ២០នាក់ស្លាប់ ៦នាក់ រងរបួស និងពីរនាក់ជាប់នៅក្រោមគំនរបាក់បែក។ ទីក្រុង Maumere គឺជាទីក្រុងសំខាន់នៅក្នុងស្រុក Sikka នៅលើកោះ Flores នៅភាគខាងកើតនៃប្រជុំកោះដ៏ធំរបស់ប្រទេសឥណ្ឌូនេស៊ី៕