ប្រព័ន្ធផ្សព្វផ្សាយរដ្ឋលីបង់បាននិយាយថា ការវាយប្រហាររបស់អ៊ីស្រាអែលនៅភាគខាងត្បូងប្រទេសនៅព្រឹកថ្ងៃសៅរ៍នេះ បានសម្លាប់មនុស្ស ៧នាក់ ដែលជាចំនួនអ្នកស្លាប់ច្រើនបំផុត ចាប់តាំងពីកិច្ចព្រមព្រៀងក្នុងខែមិថុនា បានបង្ហាញពីភាពស្ងប់ស្ងាត់នៃអរិភាពរវាងអ៊ីស្រាអែល និងក្រុមហេសបូឡា។

ទីភ្នាក់ងារសារព័ត៌មានជាតិ (NNA) បានឲ្យដឹងថា អ៊ីស្រាអែល «បានបង្កើនការវាយប្រហាររបស់ខ្លួននៅភាគខាងត្បូង» នៅព្រឹកថ្ងៃសៅរ៍នេះ ដោយរាយការណ៍ថា ការវាយប្រហារដោយយន្តហោះចម្បាំងរបស់សត្រូវទៅលើផ្ទះមួយខ្នង នៅជាយក្រុងនៃភូមិ Ansar «បានបណ្តាលឲ្យមនុស្ស ៧នាក់ និង ៣ នាក់ផ្សេងទៀតរងរបួស»។

NNA បាននិយាយថា ការវាយប្រហារនេះ បានបំផ្លាញផ្ទះ ហើយក្រុមជួយសង្គ្រោះបន្ទាន់ កំពុងរុះរើកម្ទេចកម្ទី និងដឹកជញ្ជូនជនរងគ្រោះទៅកាន់មន្ទីរពេទ្យ។

ក្រុមហេសបូឡាបានទាញប្រទេសលីបង់ចូលទៅក្នុងសង្គ្រាមមជ្ឈិមបូព៌ាក្នុងខែមីនា ជាមួយនឹងការបាញ់រ៉ូកែតទៅលើអ៊ីស្រាអែល ដើម្បីគាំទ្រអ៊ីរ៉ង់ដែលជាអ្នកគាំទ្ររបស់ខ្លួន។

អ៊ីស្រាអែលបានឆ្លើយតបដោយការវាយប្រហារតាមអាកាសយ៉ាងខ្លាំង និងការលុកលុយដោយកងទ័ពជើងគោក ដែលអាជ្ញាធរលីបង់និយាយថា បានសម្លាប់មនុស្សជាង ៤.៣០០ នាក់។

អំពើហិង្សាបានថយចុះគួរឲ្យកត់សម្គាល់ ចាប់តាំងពីការចុះហត្ថលេខាលើអនុស្សរណៈនៃការយោគយល់គ្នារវាងសហរដ្ឋអាមេរិក និងអ៊ីរ៉ង់ កាលពីខែមិថុនា ស្តីពីសង្គ្រាមមជ្ឈិមបូព៌ាដ៏ទូលំទូលាយ និងកិច្ចព្រមព្រៀងក្របខណ្ឌរវាងប្រទេសលីបង់ និងអ៊ីស្រាអែលដែលសម្របសម្រួលដោយសហរដ្ឋអាមេរិក ត្រូវបានព្រមព្រៀងគ្នា នៅចុងខែនោះ៕