ក្រសួងការបរទេសប៉ាគីស្ថានបានឲ្យដឹងថា រដ្ឋមន្ត្រីការបរទេសប្រទេសនេះ លោក Ishaq Dar កាលពីថ្ងៃសុក្រ បានគូសបញ្ជាក់ពីសារៈសំខាន់នៃការសន្ទនា និងការទូតសម្រាប់សន្តិភាពក្នុងតំបន់ បន្ទាប់ពីកិច្ចប្រជុំរបស់លោកជាមួយប្រមុខការទូតសហរដ្ឋអាមេរិក នៅទីក្រុងអ៊ីស្លាម៉ាបាដ។

ភារធារីសហរដ្ឋអាមេរិក លោកស្រី Natalie A. Baker បានជួបប្រជុំជាមួយលោករដ្ឋមន្ត្រីការបរទេស Ishaq Dar នៅទីក្រុងអ៊ីស្លាម៉ាបាដ ដែលពួកគេបានពិភាក្សាអំពីការវិវត្តក្នុងតំបន់ និងកិច្ចសហប្រតិបត្តិការទ្វេភាគី ចំពេលជម្លោះរវាងសហរដ្ឋអាមេរិក និងអ៊ីរ៉ង់នៅមជ្ឈិមបូព៌ាកំពុងជាប់គាំង។

ជម្លោះនេះបានរំខានដល់ការផ្គត់ផ្គង់ប្រេង និងឧស្ម័នសកល ក៏ដូចជាពាណិជ្ជកម្មអន្តរជាតិតាមរយៈច្រកសមុទ្រហ័រមូស ដែលដឹកជញ្ជូនប្រេងប្រហែលមួយភាគប្រាំនៃពិភពលោក និងមួយភាគបួននៃការនាំចេញឧស្ម័នធម្មជាតិរាវតាមសមុទ្រ មុនពេលសង្គ្រាមចាប់ផ្តើមនៅចុងខែកុម្ភៈ។

ទីក្រុងអ៊ីស្លាម៉ាបាដបានដឹកនាំការជំរុញការទូតរយៈពេលជាច្រើនខែ ដើម្បីជួយឈានដល់កិច្ចព្រមព្រៀងសន្តិភាពបណ្តោះអាសន្នរវាងសហរដ្ឋអាមេរិក និងអ៊ីរ៉ង់កាលពីខែមិថុនា ដើម្បីបញ្ចប់ជម្លោះ ប៉ុន្តែលោកប្រធានាធិបតី ដូណាល់ ត្រាំ បាននិយាយថា កិច្ចព្រមព្រៀងនេះ បាន «ចប់» នៅថ្ងៃទី ០៧ ខែកក្កដា ហើយក្រសួងការបរទេសអ៊ីរ៉ង់ក្រោយមកបានប្រកាសថា វាត្រូវបាន «ផ្អាក» បន្ទាប់ពីការវាយប្រហាររបស់សហរដ្ឋអាមេរិកលើអ៊ីរ៉ង់ និងការវាយប្រហាររបស់ទីក្រុងតេអេរ៉ង់លើផលប្រយោជន៍របស់សហរដ្ឋអាមេរិកនៅក្នុងតំបន់នេះ៕