ការវាយប្រហាររបស់រុស្ស៊ីបានធ្វើឲ្យកក្រើកទីក្រុងគីវកាលពីយប់ជ្រៅឈានចូលថ្ងៃអាទិត្យទី១៦ ខែសីហា ខណៈសំឡេងផ្ទុះជាច្រើនត្រូវបានឮក្នុងរដ្ឋធានីអ៊ុយក្រែនក្នុងរយៈពេលប៉ុន្មាននាទី។យោងតាមអ្នកសារព័ត៌មានឯករាជ្យគីវ នៅកណ្តាលទីក្រុង សំឡេងផ្ទុះសរុបចំនួនបួនត្រូវបានឮយ៉ាងខ្លាំង នៅម៉ោងប្រហែល ២:៥០នាទី ព្រឹក ម៉ោងក្នុងស្រុក ។

អ្នកសារព័ត៌មានម្នាក់ទៀតបាននិយាយថា សំឡេងផ្ទុះចំនួនប្រាំមួយក៏ត្រូវបានឮនៅក្នុងស្រុក Pecherskyi នៃរដ្ឋធានីនេះផងដែរក្នុងរយៈពេលបីនាទីបន្ទាប់ពីការវាយឆ្មក់តាមអាកាសបានកើតឡើង ដែលធ្វើឱ្យគ្មានពេលរកកន្លែងជ្រកកោនទេ ។

រដ្ឋបាលយោធាក្រុងគីវបាននិយាយថា ការវាយប្រហាររបស់រុស្ស៊ី បានបង្កឲ្យមានជាអគ្គិភ័យនៅអគារពាណិជ្ជកម្មមួយក្នុងស្រុក Obolonskyi។លោក Vitali Klitschko អភិបាលក្រុងគីវបានរាយការណ៍ថា អគារមួយទៀតត្រូវបានភ្លើងឆាបឆេះនៅក្នុងស្រុក Holosiivskyi នៃរដ្ឋធានីនេះ។

កងទ័ពអាកាសនៅយប់មុននេះបានព្រមានអំពីការគំរាមកំហែងនៃការវាយប្រហារដោយមីស៊ីលផ្លោងរបស់រុស្ស៊ី ដោយលុបចោលការព្រមាននៅម៉ោង ២:៣៥នាទីព្រឹក។ ប៉ុន្មាននាទីក្រោយមក នៅម៉ោង ២:៤៦នាទី ព្រឹក ការគំរាមកំហែងបានវិលត្រឡប់មកវិញ។

ជាមួយគ្នានោះ កងកម្លាំងអ៊ុយក្រែនបានកំណត់គោលដៅឃ្លាំងមួយដែលជាកម្មសិទ្ធិរបស់ក្រុមហ៊ុនលក់រាយតាមអ៊ីនធឺណិតដ៏ធំរបស់រុស្ស៊ី Wildberries និងទីក្រុងនានានៅទូទាំងតំបន់រដ្ឋធានីមូស្គូរបស់រុស្ស៊ី ក្នុងការវាយប្រហារដ៏ធំមួយកាលពីយប់ឈានចូលថ្ងៃទី១៦សីហា នេះបើយោងតាមការចុះផ្សាយរបស់សារព័ត៌មាន Exilenova Plus។

យោងតាមសារព័ត៌មាន Exilenova Plus ខាងលើបានឱ្យដឹងថា អគ្គិភ័យមួយបានឆាបឆេះឃ្លាំង Wildberries មួយកន្លែងនៅក្នុងភូមិ Koledino ជិតទីក្រុងមូស្គូ បន្ទាប់ពីត្រូវបានវាយប្រហារដោយកងកម្លាំងអ៊ុយក្រែន៕