ក្រុមអាជ្ញាធរបាននិយាយនៅថ្ងៃអាទិត្យ ១៦ សីហានេះថា មនុស្សប្រហែល ៥.០០០ នាក់ត្រូវបានជម្លៀសចេញបន្ទាប់ពីគ្រោះរញ្ជួយដីកម្រិត ៧,៧ រ៉ិចទ័របានវាយប្រហារតំបន់មួយនៅភាគខាងកើតប្រទេសឥណ្ឌូនេស៊ី ដោយបានសម្លាប់មនុស្សយ៉ាងហោចណាស់៥១នាក់ កាត់ផ្ដាច់ផ្លូវនានា និងបណ្ដាលឲ្យមានបំណាក់ដី។អនុរដ្ឋមន្ត្រីក្រសួងសុខាភិបាលលោក Benjamin Paulus Octavianus បានប្រាប់កិច្ចប្រជុំតាមទូរទស្សន៍ថា មនុស្សចំនួន ៣៦ នាក់បានរងរបួសធ្ងន់នៅក្នុងការរញ្ជួយដីកាលពីព្រឹកថ្ងៃសៅរ៍នៅខេត្ត East Nusa Tenggara ខណៈ ៧៧ នាក់រងរបួសស្រាល។

ការរញ្ជួយដីនេះ ដែលក្រោយមកមានរលករញ្ជួយបន្ថែមប្រហែល ៣៤១លើក គឺជាគ្រោះរញ្ជួយដីដ៏ធ្ងន់ធ្ងរបំផុតរបស់ប្រទេសអាស៊ីអាគ្នេយ៍មួយនេះក្នុងរយៈពេលជាច្រើនឆ្នាំ។ មនុស្សរាប់រយនាក់បានស្លាប់បន្ទាប់ពីការរញ្ជួយដីកាលពីឆ្នាំ ២០២២ នៅខេត្តជា្វខាងលិច ( West Java)។

ទីភ្នាក់ងារកាត់បន្ថយគ្រោះមហន្តរាយ BNPB បាននិយាយថា មនុស្សជាង ៣.៣០០ នាក់ក្នុងតំបន់ Sikka បានជម្លៀសចេញដោយខ្លួនឯង ឬជាប់នៅក្នុងទីលានកីឡានានា។

អ្នកស្រុក Sikka មួយចំនួនដែលត្រូវបានជាប់នៅខាងក្រៅផ្ទះដួលរលំ កំពុងស្នាក់នៅក្រោមជំរំបណ្តោះអាសន្នដែលធ្វើពីក្រណាត់តង់ ខណៈមនុស្សមួយចំនួនបានទទួលការព្យាបាលក្នុងតង់នៅខាងក្រៅមន្ទីរពេទ្យមួយក្នុងទីក្រុងកំពង់ផែ Maumere។

ទីភ្នាក់ងារឧតុនិយម និងភូគព្ភសាស្ត្រឥណ្ឌូនេស៊ីបានបញ្ជាក់ថា ការរញ្ជួយដីកម្រិត ៧,៧ រ៉ិចទ័របានវាយប្រហារកោះ Flores មិនយូរប៉ុន្មានមុនម៉ោង ០៥:០០ ម៉ោងក្នុងតំបន់ និងមានជម្រៅ ១៥ គីឡូម៉ែត្រ។របាយការណ៍បឋមបង្ហាញថា អគាររាប់រយត្រូវបានខូចខាតយ៉ាងធ្ងន់ធ្ងរដោយសារការរញ្ជួយដីនេះ។ទោះជាយ៉ាងណាក៏ដោយ ទំហំពេញលេញនៃគ្រោះមហន្តរាយនៅតែមិនទាន់ច្បាស់លាស់ ហើយព័ត៌មាននៃការរញ្ជួយដីលើកទីពីរកម្រិត ៦,៩ រ៉ិចទ័រនៅចុងម្ខាងទៀតនៃប្រទេសឥណ្ឌូនេស៊ីបានក្លាយជាការរំលឹកអំពីមូលហេតុដែលពួកគេហៅតំបន់នេះថាជាកងរង្វង់ភ្លើង៕