មន្ត្រីរាជការ និងមន្ត្រីជាប់កិច្ចសន្យានៅខេត្តកំពតចំនួន ១ ៤៥២នាក់បន្ថែមទៀត បានទទួលការបំពាក់មេដាយការងារពីរាជរដ្ឋាភិបាល ដើម្បីជាការទទួលស្គាល់ និងលើកទឹកចិត្តចំពោះការខិតខំបំពេញភារកិច្ចបម្រើជាតិ និងប្រជាពលរដ្ឋកន្លងមក ខណៈអភិបាលខេត្តកំពតជំរុញឱ្យមន្ត្រីដែលទទួលបានមេដាយ បន្តពង្រឹងសមត្ថភាព និងបំពេញការងារជូនប្រជាពលរដ្ឋឱ្យកាន់តែល្អប្រសើរ។

នៅព្រឹកថ្ងៃទី១៥ ខែសីហា ឆ្នាំ២០២៦ ឯកឧត្តម ម៉ៅ ធនិន អភិបាលខេត្តកំពត បានអញ្ជើញជាអធិបតីក្នុងពិធីបំពាក់មេដាយការងារជូនមន្ត្រីរាជការ និងមន្ត្រីជាប់កិច្ចសន្យា នៃរដ្ឋបាលស្រុកចំនួន៥ រួមមាន ស្រុកបន្ទាយមាស អង្គរជ័យ ឈូក ជុំគិរី និងដងទង់ នៅសាលសន្និសីទបូកគោ សាលាខេត្តកំពត។

មានប្រសាសន៍ក្នុងពិធីនេះ ឯកឧត្តម ម៉ៅ ធនិន បានលើកឡើងថា ការផ្តល់មេដាយការងារដល់មន្ត្រីរាជការ គឺជាការយកចិត្តទុកដាក់ និងការវាយតម្លៃចំពោះការខិតខំបំពេញតួនាទី និងភារកិច្ចរយៈពេលចាប់ពី១០ឆ្នាំឡើងទៅ ក្នុងការបម្រើជាតិ និងប្រជាពលរដ្ឋ។ សម្រាប់ខេត្តកំពត មន្ត្រីដែលត្រូវទទួលមេដាយការងារសរុបមានចំនួន ២ ៣០២នាក់ ក្នុងនោះស្រី ១ ២៥២នាក់ ដែលរួមមានមន្ត្រីរដ្ឋបាលក្រុង-ស្រុក មន្ត្រីសុខាភិបាល និងមន្ត្រីអប់រំ។

ឯកឧត្តមអភិបាលខេត្តបានចាត់ទុកការទទួលបានមេដាយការងារនេះថា ជាមោទនភាពមួយសម្រាប់មន្ត្រីរាជការ ព្រោះវាបង្ហាញពីការទទួលស្គាល់ចំពោះរយៈពេល និងការខិតខំប្រឹងប្រែងរបស់មន្ត្រីម្នាក់ៗក្នុងការបំពេញតួនាទីតាមជំនាញវិជ្ជាជីវៈ និងចូលរួមបម្រើប្រជាពលរដ្ឋនៅមូលដ្ឋាន។

ជាមួយគ្នានេះ ឯកឧត្តម ម៉ៅ ធនិន បានជំរុញឱ្យមន្ត្រីដែលទទួលបានមេដាយការងារនាពេលនេះ មិនត្រឹមតែចាត់ទុកមេដាយជាកិត្តិយសសម្រាប់ការងារកន្លងមកប៉ុណ្ណោះទេ ប៉ុន្តែត្រូវយកវាជាកម្លាំងចិត្ត ដើម្បីបន្តខិតខំលើកកម្ពស់សមត្ថភាព និងគុណភាពការងារ ពិសេសការបម្រើប្រជាពលរដ្ឋឱ្យបានល្អប្រសើរថែមទៀត។

ឯកឧត្តមបានបញ្ជាក់ថា ការលើកទឹកចិត្តតាមរយៈការផ្តល់មេដាយការងារ គឺជាការគិតគូររបស់រាជរដ្ឋាភិបាលចំពោះមន្ត្រីដែលបានលះបង់ពេលវេលា កម្លាំងកាយ និងកម្លាំងចិត្តក្នុងការបំពេញភារកិច្ច ហើយមន្ត្រីគ្រប់រូបគួរបន្តរក្សាស្មារតីទទួលខុសត្រូវ និងបម្រើប្រជាពលរដ្ឋដោយស្មោះត្រង់ និងប្រកបដោយវិជ្ជាជីវៈ។

សូមបញ្ជាក់ថា ពិធីនេះជាលើកទី២ ដែលរដ្ឋបាលខេត្តកំពតបានរៀបចំបំពាក់មេដាយការងារជូនមន្ត្រីរាជការ និងមន្ត្រីជាប់កិច្ចសន្យា។ លើកទី១ មានចំនួន ៨៥០នាក់ ក្នុងនោះស្រី ៤៩២នាក់ ខណៈលើកទី២នេះមានចំនួន ១ ៤៥២នាក់ ក្នុងនោះស្រី ៧៦៣នាក់។ សរុបទាំងពីរលើក មន្ត្រីដែលបានទទួលមេដាយការងារមានចំនួន ២ ៣០២នាក់ ក្នុងនោះស្រី ១ ២៥២នាក់៕