ប្រជាពលរដ្ឋដែលមានបញ្ហាជំងឺភ្នែកចំនួន ២៧០ នាក់ មកពីស្រុកចំនួន៣ ក្នុងខេត្តកំពង់ធំ ទទួលបានការពិនិត្យ និងព្យាបាលជំងឺ ដោយឥតគិតថ្លៃនៅមន្ទីរពេទ្យរុស្ស៉ី នៅក្រោមកិច្ចសហការរវាងធនាគារជាតិនៃកម្ពុជា, អង្គការជំនួយមនុស្សធម៌សុខភាពអូស្ត្រាលី, មូលនិធិចក្ខុខ្មែរ និងផ្នែកចក្ខុរោគនៃមន្ទីរពេទ្យមិត្តភាពខ្មែរ-សូវៀត។

លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា និងសហការី នៅរសៀលថ្ងៃទី១៥ ខែសីហា ឆ្នាំ២០២៦ បាន អញ្ជើញចុះសាកសួរសុខទុក្ខប្រជាពលរដ្ឋដែលមានបញ្ហាជំងឺភ្នែកចំនួន ២៧០ នាក់ មកពីស្រុក​សណ្តាន់ ស្រុកប្រាសាទសំបូរ និងស្រុក សន្ទុក ក្នុងខេត្តកំពង់ធំ មកពិនិត្យ និងវះកាត់ភ្នែក (ជំងឺភ្នែកឡើងបាយ និងដុះកន្ទុយថ្លែនដោយឥតគិតថ្លៃ) នៅមន្ទីរពេទ្យមិត្តភាព ខ្មែរ-សូវៀត ដែលនេះជាការលើកកម្ពស់បញ្ហាសុខភាពសាធារណៈ កាត់បន្ថយអត្រាពិការភាព និងការស្លាប់ ព្រមទាំងធានាឱ្យប្រជា- ពលរដ្ឋមានរាងកាយរឹងមាំ និងគុណភាពជីវិតល្អប្រសើរ។

ក្នុងការចុះសាកសួរសុខទុក្ខនេះ, លោកជំទាវបណ្ឌិត ក៏បានលើកឡើងអំពីការយកចិត្តទុកដាក់របស់រាជរដ្ឋាភិបាល លើការ លើកកម្ពស់សុខភាព និងសុខុមាលភាពរបស់ប្រជាពលរដ្ឋឱ្យកាន់តែប្រសើរ ជាពិសេសប្រជាពលរដ្ឋក្រីក្រ ជនងាយរងគ្រោះដូចជា ស្រ្តី កុមារ វ័យជជំទង់ មនុស្សចាស់ជរា និងជនមានពិការភាព និងការកសាងភាពជាដៃគូរវាងផ្នែកសាធារណៈ និងឯកជន ក្នុងការលើក កម្ពស់សេវាបង្ការព្យាបាល និងថែទាំសុខភាព ដែលឈរលើគោលការណ៍ផលប្រយោជន៍សុខភាពសាធារណៈ។

ជាក់ស្តែងការពិនិត្យ និងព្យាបាលជំងឺភ្នែកនៅពេលនេះ បានកើតឡើងក្រោមកិច្ចសហការគ្នាយ៉ាងជិតស្និទ្ធ រវាងធនាគារ ជាតិនៃកម្ពុជា, ផ្នែកចក្ខុរោគនៃមន្ទីរពេទ្យមិត្តភាពខ្មែរ-សូវៀត, អង្គការជំនួយមនុស្សធម៌សុខភាពអូស្ត្រាលី និងមូលនិធិចក្ខុខ្មែរ ដែល កម្មពិធីមនុស្សធម៌នេះ ប្រព្រឹត្តទៅចាប់ពីថ្ងៃទី ១៤ ដល់ថ្ងៃទី ១៨ ខែសីហា ឆ្នាំ២០២៦ នៅមន្ទីរពេទ្យមិត្តភាពខ្មែរ-សូវៀត។ តាមរយៈ នៃកិច្ចសហប្រតិបត្តិការនេះ ប្រជាពលរដ្ឋបានផលប្រយោជន៍រួមមាន៖ ការពិនិត្យជំងឺទូទៅ និងការពិនិត្យសុខភាពភ្នែកពីក្រុមគ្រូពេទ្យ ឯកទេសជំនាញ, ការវះកាត់ជំងឺភ្នែកឡើងបាយ និងជំងឺដុះកន្ទុយថ្លែនដោយឥតគិតថ្លៃ, ការផ្តល់ថ្នាំសង្កូវ ការប្រឹក្សាយោបល់ និងការ ថែទាំក្រោយពេលវះកាត់, និងផ្តល់ជូនកន្លែងស្នាក់នៅហូបចុកគ្រប់យ៉ាង។ វត្តមាននៃបេសកកម្មមនុស្សធម៌ គឺជាចំណែកដ៏សំខាន់ ក្នុង ការជួយសម្រាលបន្ទុកសេដ្ឋកិច្ច ដល់ប្រជាពលរដ្ឋក្រីក្រមានជីវភាពខ្វះខាត ព្រមទាំងជួយឱ្យពួកគាត់អាចមានលទ្ធភាពមើលឃើញ ច្បាស់ ដើម្បីទ្រទ្រង់ជីវភាពប្រចាំថ្ងៃ និងបង្កើនគុណភាពជីវិតកាន់តែប្រសើរឡើងវិញ៕ អត្ថបទ៖ សុន រ៉ាឌី