កាលពីថ្ងៃសៅរ៍ម្សិលមិញ នាយករដ្ឋមន្រ្តីជប៉ុនលោកស្រី Sanae Takaichi បានសន្យាថា នឹងមិនឲ្យមានម្តងទៀតជាដាច់ខាតសោកនាដកម្មសង្រ្គាម នៅក្នុងពិធីរំឭកខួបអនុស្សាវរីយ ៨១ឆ្នាំ ចាប់តាំងពីការបញ្ចប់សង្រ្គាមលោកលើកទី ២ ។

ថ្លែងនៅក្នុងពិធីប្រចាំឆ្នាំរំឭកខួបការចុះចាញ់របស់ជប៉ុននៅក្នុងសង្រ្គាមលោកលើកទី ២ លោកស្រី Takaichi និយាយថា ពួកយើងមិនត្រូវបណ្តោយឲ្យសោកនាដកម្មសង្រ្គាមកើតឡើងម្តងទៀតនោះឡើយ ។ ៨១ឆ្នាំ បានកន្លងផុតទៅហើយ ចាប់តាំងពីការបញ្ចប់សង្រ្គាម ប៉ុន្តែមិនសំខាន់រយៈពេលយូរប៉ុន្មានបានកន្លងផុតទៅនោះទេ ពួកយើងត្រូវរក្សាពាក្យសន្យាដ៏ម៉ឺងម៉ាត់នេះ ហើយត្រូវបញ្ជូនវាទៅមនុស្សគ្រប់ជំនាន់ ។

ព្រះចៅអធិរាជ Naruhito និងព្រះរាជិនី Masako បានមានវត្តមាននៅក្នុងពិធីនោះផងដែរ ដែលគេមើលឃើញអ្នកចូលរួម នាំគ្នាស្មឹងស្មាធិ៍រយៈពេល ១នាទី ដើម្បីគោរពវិញ្ញាណក្ខន្ធដល់អ្នកស្លាប់នៅក្នុងសង្រ្គាម ។

ទីភ្នាក់ងារព័ត៌មាន Kyodo រាយការណ៍ថា លោកស្រី Takaichi ដែលបានឡើងកាន់តំណែងជានាយករដ្ឋមន្រ្តីជប៉ុនកាលពីខែតុលា ឆ្នាំមុន បានផ្តល់ដង្វាយតាមបែបប្រពៃណីដល់ទីសក្ការៈបូជាជម្លោះ Yasukuni កាលពីព្រឹកថ្ងៃសៅរ៍ ។

សម្រាប់ប្រទេសជិតខាងអាស៊ីខាងកើតរបស់ជប៉ុន ពួកគេ បានចាត់ទុកទីសក្ការៈបូជាមួយនេះថា ជានិមិត្តរូបនៃការឈ្លានពាន៕