ឃី​ក​បុក​ស៊ី​ង​៖ ក្រុម​កីឡា​ឃី​ក​បុក​ស៊ី​ង​ជម្រើសជាតិ​កម្ពុជា បានបញ្ចប់​យុទ្ធនា​ការប្រកួត​កីឡា​ស៊ី​ហ្គេមលើក​ទី​៣១ ថ្ងៃទី២ ជាមួយ​លទ្ធផល​មិនសូវ​គាប់ប្រសើរ​ឡើយ បន្ទាប់ពី​កីឡាករ​-​កីឡាការិនី ៤​រូប​ចុងក្រោយដែល​ធ្វើការ​ប្រកួត​ជុំ​ដំបូងកាលពី​ថ្ងៃទី​០៩ ខែឧសភា​ម្សិលមិញបានទទួល​ជ័យជម្នះ​តែ​ម្នាក់​ប៉ុណ្ណោះ។​

​កីឡាករ​កម្ពុជាដែល​ទទួលបាន​ជ័យជម្នះ​នេះគឺ​កីឡាករ ឈឿង ល្វៃ ដែល​បាន​យក​កីឡាករ​សិង្ហ​បុរី Nazri Bin Sutari Muhammad ដោយ​ពិន្ទុដើម្បី​ឡើង​វគ្គ​ពាក់កណ្ដាល​ផ្ដាច់ព្រ័ត្រ និង​បាន​កក់​មេដាយ​សំរឹទ្ធលើ​វិញ្ញាសា ៧១​គីឡូក្រាម បន្ទាប់ពី​ធ្វើការ​ប្រកួត​ដ៏​ស្វិតស្វាញ​ពេញ ៣​ទឹក។​ ​រីឯ​កីឡាករ​-​កីឡាការិនី ៣​រូប​ទៀតដែល​របូត​ឱកាស​ឡើង​វគ្គ​បន្ដរួមមាន​កីឡាករ ខាំ ខ្លា​នាង ប្រកួត​ចាញ់​ពិន្ទុ​កីឡាករ​ម៉ាឡេស៊ី Masdor Mohammad Rifdean ដោយ​ពិន្ទុលើ​វិញ្ញាសា​ទម្ងន់ ៥១​គីឡូក្រាម​, កីឡាករ ឈុត វ៉ាន់​ថង ចាញ់​ម្ចាស់ផ្ទះ​វៀតណាមកីឡាករ Nguyen Quang Huy ដោយ​ពិន្ទុលើ​វិញ្ញាសា​ទម្ងន់ ៦០​គីឡូក្រាម និង​កីឡាការិនី ទូច ចាន់​វ​ត្តី ចាញ់​កីឡាករ​ថៃ Namrak Surachada ដោយ​ពិន្ទុលើ​វិញ្ញាសា​ទម្ងន់ ៥៦​គីឡូក្រាម។​

​សរុប​លទ្ធផល​របស់​ក្រុម​អត្ត​ព​លិ​ក​កីឡា​ឃី​ក​បុក​ស៊ី​ង​កម្ពុជា បន្ទាប់ពី​បញ្ចប់​ការប្រកួត​ជុំ​ដំបូងក្នុងចំណោម​កីឡាករ​-​កីឡាការិនី ៩​រូបគឺមាន ៥​រូបបាន​ឡើង​វគ្គ​ពាក់កណ្ដាល​ផ្ដាច់ព្រ័ត្រនៃ​ព្រឹត្តិការណ៍​ប្រចាំ​តំបន់​នេះ រួមមាន​កីឡាករ ឈឿង ល្វៃ រួមជាមួយ​មិត្ត​រួម​ជាតិ​កីឡាករ ទូច រ៉ា​ឆាន់​, កាន់ ម៉េង​ហុង និង សាន រ៉ា​គីម ដែល​ដណ្ដើមបាន​ជ័យជម្នះ​ក្នុងការ​ប្រកួត​ថ្ងៃទី​១ ខណៈ​ម្នាក់ទៀតគឺ​កីឡាករ លន់ បញ្ញា ដែល​បាន​ចាប់ឆ្នោត​ឈរ​ចាំ​វគ្គ​ពាក់កណ្ដាល​ផ្ដាច់ព្រ័ត្រ និង​បាន​កក់​មេដាយ​សំរឹទ្ធ​ក្នុង​ដៃ​ផងដែរ៕ ​អត្ថបទ៖ លី ឈុន​ឡា