ភ្នំពេញ៖សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៅព្រឹកថ្ងៃអង្គារ ទី១៨ ខែសីហា ឆ្នាំ២០២៦ បានអញ្ជើញដឹកនាំកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ដើម្បីពិភាក្សា និងអនុម័តតាមរបៀបវារៈមួយចំនួន។

ជាលទ្ធផល កិច្ចប្រជុំបានអនុម័តកាលបរិច្ឆេទបន្តសម័យប្រជុំរដ្ឋសភាលើកទី៦ នីតិកាលទី៧ នៅថ្ងៃព្រហស្បតិ៍ ទី២០ ខែសីហា ឆ្នាំ២០២៦ ខាងមុខ ដើម្បីពិភាក្សា និងអនុម័តសេចក្ដីព្រាងច្បាប់ស្តីពីវិសោធនកម្មច្បាប់ស្ដីពីការគ្រប់គ្រងរដ្ឋបាលឃុំ សង្កាត់។

សូមជម្រាបថា សេចក្តីព្រាងច្បាប់ស្តីពីវិសោធនកម្មច្បាប់ស្តីពីការគ្រប់គ្រងរដ្ឋបាលឃុំ សង្កាត់ គឺជាការកែទម្រង់គតិយុត្តដ៏សំខាន់មួយ ដែលគណៈកម្មការជំនាញនៃរដ្ឋសភាកម្ពុជាបានពិនិត្យ និងពិភាក្សា អនុម័តយកទី២០ ខែសីហាខាងមុខ ដើម្បីពិភាក្សា និងអនុម័ត។ សេចក្តីព្រាងច្បាប់វិសោធនកម្មនេះមាន មានចំនួន ២ មាត្រា៖ មាត្រាមួយ៖ ចែងអំពីការធ្វើវិសោធនកម្មដោយកែប្រែមាត្រាចំនួន ៤ នៃច្បាប់ស្តីពីការគ្រប់គ្រងរដ្ឋបាលឃុំ-សង្កាត់ រួមមាន មាត្រា៣៣ មាត្រា៣៤ មាត្រា៣៥ និងមាត្រា៣៨។ មាត្រាពីរ៖ ចែងអំពីការអនុវត្តបទប្បញ្ញត្តិនៃច្បាប់នេះ ចាប់ពីការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ សម្រាប់អាណត្តិទី៦ តទៅ។

គោលបំណងសំខាន់នៃវិសោធនកម្ម គឺដើម្បីពង្រឹងរដ្ឋបាលមូលដ្ឋាន៖ កែសម្រួលរចនាសម្ព័ន្ធដឹកនាំ មុខងារ និងការទទួលខុសត្រូវរបស់រដ្ឋបាលឃុំ សង្កាត់ ឱ្យស្របតាមការវិវត្តនៃនយោបាយវិមជ្ឈការ និងវិសហមជ្ឈការនៅកម្ពុជា និងរៀបចំការបោះឆ្នោត៖ រៀបចំមូលដ្ឋានគតិយុត្តឱ្យបានច្បាស់លាស់ សម្រាប់ការគ្រប់គ្រង និងការអនុវត្តការងាររបស់ក្រុមប្រឹក្សាឃុំសង្កាត់ថ្មី ដែលនឹងត្រូវជ្រើសរើសសម្រាប់អាណត្តិទី៦ ខាងមុខ៕