កីឡា៖ ក្រសួងអប់រំ យុវជន និងកីឡាបានរៀបចំសិក្ខាសាលាពិនិត្យសេចក្ដីព្រាងដំបូង នៃសេចក្តីព្រាងច្បាប់គ្រប់គ្រងអនុវិស័យអប់រំកាយ និងកីឡារយៈពេល ២ថ្ងៃនៅថ្ងៃទី៩-១០ ខែឧសភា ឆ្នាំ២០២២ នៅវិទ្យាស្ថានជាតិអប់រំ ដើម្បីប្រមូលធាតុចូលសំខាន់ៗមកពង្រឹងច្បាប់មួយនេះឲ្យកាន់តែមានប្រសិទ្ធភាពពេលអនុវត្ត។
ឯកឧត្តម ប៊ូ ជុំសេរី អនុរដ្ឋលេខាធិការក្រសួងអប់រំបានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងយ៉ាងយកចិត្តទុកដាក់ ក្នុងការចូលរួមផ្តល់មតិយោបល់ពីមន្ទីរអប់រំ យុវជន និងកីឡាទាំង ២៥រាជធានី-ខេត្ត អង្គការសង្គមកីឡា ភាគីពាក់ព័ន្ធ ព្រមទាំងនាយកដ្ឋានជំនាញក្រោមឱវាទក្រសួង ដែលជាការបំពេញបន្ថែមនូវធាតុចូលឲ្យបានគ្រប់ជ្រុងជ្រោយ ក្នុងដំណើរការតាក់តែងសេចក្តីព្រាងច្បាប់ ស្តីពីការគ្រប់គ្រងអនុវិស័យអប់រំកាយ និងកីឡានេះ។ ឯកឧត្តមបន្ដថា ការរៀបចំតាក់តែងសេចក្តីព្រាងច្បាប់នីមួយៗមិនមែនជាការងាយនោះទេ ពោលគឺត្រូវធ្វើឡើងក្នុងរយៈពេលយូរដើម្បីប្រមែប្រមូលនូវធាតុចូលឲ្យបានគ្រប់ជ្រុងជ្រោយ។ ជាក់ស្តែងសេចក្តីព្រាងច្បាប់គ្រប់គ្រងអនុវិស័យអប់រំកាយ និងកីឡានេះក៏ត្រូវការពេលវេលាច្រើន ហើយកំពុងស្ថិតក្នុងការប្រមូលធាតុចូល និងពិភាក្សាក្នុងកម្រិតគណៈកម្មការជំនាញផ្នែកអប់រំកាយ និងកីឡានៅឡើយ។
ចំពោះនីតិវិធីនៃសេចក្តីព្រាងច្បាប់នេះ នៅពេលបញ្ចប់ក្នុងកម្រិតជំនាញផ្នែកអប់រំកាយ និងកីឡា ហើយត្រូវឆ្លងបន្តទៅគណៈកម្មការកំណែទម្រង់យុត្តិធម៌នៃក្រសួងអប់រំ យុវជន និងកីឡា ហើយត្រូវឆ្លងកាត់ការឯកភាពពីឯកឧត្តមរដ្ឋមន្ត្រីក្រសួងអប់រំ រួចបន្តស្នើសុំទៅពិភាក្សានៅក្នុងក្របខណ្ឌក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី មុនពេលស្នើសុំការពិភាក្សាពីសភា។ ដូច្នេះតាមរយៈការរៀបចំសិក្ខាសាលានេះ ក៏ជាពេលវេលាដ៏សំខាន់មួយសម្រាប់អ្នកចូលរួម ផ្ដល់នូវមតិ និងធាតុចូលបន្ថែម ឆ្ពោះទៅរកការបង្កើតឲ្យមានសេចក្ដីព្រាងច្បាប់ប្រកបដោយខ្លឹមសារមួយ ស្ដីពីការគ្រប់គ្រងអនុវិស័យអប់រំកាយ និងកីឡានាពេលខាងមុខ។ នេះបើតាមការបញ្ជាក់បន្ថែមរបស់ឯកឧត្តម ប៊ូ ជុំសេរី៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
