២០២៦នេះ កម្ពុជានឹងបំបែកកំណត់ត្រានាំអង្ករចេញអោយបាន១លានតោន ក្រោយរយៈពេល១៥ឆ្នាំនៃផែនការដែលបានដាក់ចេញកាលពីឆ្នាំ២០១០ ខណៈរយៈពេល ៧ខែ ឆ្នាំនេះបាននាំចេញអង្ករចំនួន ៧០៧,៤៧១ តោនរួចហើយ។

​ក្នុងចំណោមប្រទេសនាំចេញអង្ករទៅកាន់ទៅទីផ្សារអន្តរជាតិ កម្ពុជា ចាត់ទុកថាជាប្រទេសវ័យក្មេងជាងគេក្នុងចំណោមប្រទេសនាំចេញធំៗដូចជា ប្រទេសវៀតណាម ថៃ ឥណ្ឌា និងប៉ាគីស្ថាន ។ ជាមហិច្ចតារបស់រាជរដ្ឋាភិបាលកម្ពុជាតាំងពីឆ្នាំ២០១០ដែលពេលនោះ ក្រោមការដឹកនាំដោយសម្តេចអគ្គមហាសេនាបតីតេជោ ហ៊ុន សែន បានដាក់ចេញនូវគោលនយោបាយ ផែនការជំរុញការផលិតស្រូវ និង ការនាំចេញអង្ករឱ្យបាន ១លានតោននៅក្នុង១ឆ្នាំ។

 រយៈពេល១៥ឆ្នាំកន្លងមក ការនាំចេញអង្ករកម្ពុជា មិនទាន់សម្រេចបានបរិមាណ១លានតោននោះទេ ដោយសារតែកត្តាជាច្រើន។ ប៉ុន្តែនៅក្នុងឆ្នាំ២០២៦នេះ ប្រធានសហពន្ធ័ស្រូវអង្ករកម្ពុជា ឧកញ៉ាបណ្ឌិត ឡាយ ឈុន ហួរ ធានាអះអាងថា ១លានតោន នឹងសម្រេចបាន១០០ភាគរយ ដោយអាស្រ័យលើកត្តាសំខាន់ចំនួន៤។ កត្តាទី១ ការទទួលស្គាល់គុណភាពអង្ករប្រណីតកម្ពុជាពីដៃគូអន្តរជាតិ ដូចជា អង្ករសែនក្រអូប រំដួល និង ស្រង៉ែជាដើមពី ។ ទី២ការពង្រីកទីផ្សារថ្មីៗ ដូចជាហ្វីលីពីនដែលពីមុននាំចូលអង្ករពីវៀតណាម និង ថៃ ប៉ុន្តែឆ្នាំនេះ ហ្វីលីពីនបានក្លាយជាទីផ្សារដ៏ធំរបស់កម្ពុជា។ ទី៣ការជ្រោមជ្រែងពីរាជរដ្ឋាភិបាល តាមរយះកាលបង្កើតកិច្ចព្រមព្រៀងពាណិជ្ជកម្មសេរីទ្វេភាគី និង តំបន់ ដែលអាចជម្រុញបរិមាណនាំចេញកាន់តែប្រសើរ និង ទី៤ ការបំពាក់ឧបករណ៍កែច្នៃទំនើបចុងក្រោយក្នុងរោងម៉ាស៊ីនធំៗ ដែលនាំអោយទីផ្សារអន្តរជាតិទទួលស្គាល់គុណភាពអង្ករកម្ពុជា ដែលមានអនុលោមភាពត្រឹមត្រូវច្បាស់លាស់។ សូមបញ្ជាក់ថានៅក្នុងរយះពេល៧ខែកន្លងមកនេះ កម្ពុជានាំចេញអង្ករបានចំនួន នៅចំនួន ៧០៧,៤៧១ តោន ដែលទទួលបានទឹកប្រាក់ចំសរុបប្រមាណ ៤១៥.១២ លានដុល្លារសហរដ្ឋអាមេរិក។ តាមការបញ្ជាក់ពីប្រធានសហពន្ធ័ស្រូវអង្ករដដែល ការនាំចេញនៅឆមាសទី២ ជារៀងរាល់ឆ្នាំ តែងតែខ្ពស់ជាងឆមាសទី១ ដូច្នេះ លោកធានាអះអាងថា ឆ្នាំនេះកម្ពុជា ពិតជាអាចបំបែករបាំងនាំចេញអង្ករបាន១លានតោនដោយជោគជ័យ៕