ភ្នំពេញ៖ ប្រជាពលរដ្ឋរស់នៅរាជធានីភ្នំពេញ មានមោទនភាពចំពោះយុទ្ធសាស្ត្រប្រយុទ្ធប្រឆាំង នឹងជំងឺកូវីដ-១៩ ដែលបានដាក់ចេញដោយសម្តេចតេជោ ហ៊ុន សែន នាយករដ្ឋមន្រ្តី បានគ្រប់គ្រងស្ថាន ភាពជំងឺកូវីដ-១៩បានល្អ រហូតគ្មានអ្នកឆ្លង ក្នុងរយៈពេលចុងក្រោយនេះ ។

ប្រជាពលរដ្ឋ នៅរាជធានីភ្នំពេញ បាននិយាយថា រយៈពេលបីថ្ងៃចុងក្រោយនេះ ពួកគេពិតជា​សប្បាយ​ចិត្ត​ណាស់ ​ដែល​ទទួលដំណឹងថា មិនមានអ្នកឆ្លងជំងឺកូវីដ-១៩ ​ដែលវាបានបង្កផលលំបាក​អស់ ​រយៈពេលពីរឆ្នាំមកហើយ​ ធ្វើឱ្យប៉ះពាល់ដល់សេដ្ឋកិច្ចជាតិ ​និងប្រជាពលរដ្ឋ ពិសេស​គឺ​សុខភាពសាធារណៈតែម្ដង។

ប្រជាពលរដ្ឋ បាន​កោត​សរសើរ​ចំពោះការដឹកនាំប្រយុទ្ធប្រឆាំងនឹងជំងឺកូវីដ-១៩ របស់សម្ដេចតេ ជោ ហ៊ុន សែន ​ដែលបានប្រើយុទ្ធសាស្រ្ត​ចាក់ស្រោចវ៉ាក់សាំង​ជូនពលរដ្ឋ ​ដែល​មកដល់ពេលនេះ ស្ទើរតែគ្រប់គ្នាហើយនោះ​ធានាដល់ការបើកដំណើរការប្រទេសឡើងវិញជាធម្មតា​ ធ្វើឱ្យការរស់នៅ និង​ប្រកបរបរ អាជីវកម្ម ​មានភាពប្រសើរជាងមុន។

ប្រទេសកម្ពុជា រយៈពេលបីថ្ងៃមកនេះ ​មិនបានកត់ត្រាអ្នកឆ្លងជំងឺកូវីដ-១៩នោះទេ​ ដែលនេះបាន បង្ហាញ​ឱ្យឃើញពីការយកចិត្តទុកដាក់របស់ប្រជាពលរដ្ឋ ​ក្នុងការចូលរួមជាមួយនឹងរាជរដ្ឋាភិបាល ក្នុងការ ​ប្រយុទ្ធប្រឆាំងនឹងជំងឺកូវីដ-១៩ រហូតបានទទួលជោគជ័យ៕ អត្ថបទ៖ សេក ឧត្តម