ភ្នំពេញ៖ សម្ព័ន្ធសមាគមសហគ្រាសធុនតូច និងមធ្យមកម្ពុជា បើកវេទិការផ្គូផ្គងអាជីវកម្មសម្រាប់សហគ្រាសក្នុងស្រុក ដើម្បីពន្លឿនការអភិវឌ្ឍអាជីវកម្ម ឱ្យមានវិសាលភាពធំទូលំទូលាយ និងដើម្បីលើកកម្ពស់សហគ្រិនស្រ្តីឲ្យមានការរីកចំរើន ក្នុងការធ្វើពាណិជ្ជកម្ម និងការអភិវឌ្ឍ ។

នៅថ្ងៃទី ១០ ខែឧសភា ឆ្នាំ២០២២ នេះ ឯកឧត្តម គឹម ទូច រដ្ឋលេខាធិការ នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានចូលរួមក្នុងកម្មវិធីវេទិការផ្គូផ្គងអាជីវកម្ម សម្រាប់សហគ្រាសធុនតូច និងមធ្យម ថ្ងៃទី១០ ខែឧសភា ឆ្នាំ២០២២ ដែលរៀបចំ​ដោយ​សម្ព័ន្ធ​សមាគម​សហគ្រាសធុនតូច​ និងមធ្យមកម្ពុជា។

គោលបំណងផ្គូផ្គងអាជីវកម្ម សម្រាប់សហគ្រាសធុនតូច និងមធ្យម ​នៅក្នុងចំណោមសកម្មភាព​អាជីវកម្ម​ជាច្រើន​ គឺដើម្បីពន្លឿនការអភិវឌ្ឍអាជីកម្មនៅកម្ពុជា ​ឲ្យមានវិសាលភាពធំទូលំទូលាយ កម្មវិធីមានការសហការណ៍រួមគ្នា ​រវាងក្រសួងស្ថាប័នរបស់រាជរដ្ឋាភិបាល​ ដៃគូរអភិវឌ្ឍន៍ វិស័យ​ឯកជន អង្គការសង្គមស៊ីវិល ​និងដៃគូរពាក់ព័ន្ធទាំងអស់​ ដើម្បីលើកកម្ពស់​សហគ្រាសក្នុងស្រុក និង​សហគ្រិនស្រ្តីឲ្យមានការរីកចំរើន​ ក្នុងការធ្វើពាណិជ្ជកម្ម និងការអភិវឌ្ឍ ដើម្បីប្រកួតប្រជែង និង​ជម្រុញ​ទីផ្សារនាំចេញជាដើម។

វេទិការផ្គូផ្គងអាជីវកម្ម ​ដែលរៀបចំដោយសម្ព័ន្ធសមាគមសហគ្រាសធុនតូច​ និងមធ្យមកម្ពុជា (FASMEC) មា​នការគាំទ្ររបស់ USAID​ និងអង្គការផេកកម្ពុជា ​ក្រោមគម្រោងសហគ្រិននារីសកម្ម (WE Act) ​មានរយៈពេល ១ឆ្នាំ ដោយត្រូវអនុវត្តនៅក្នុងរាជធានីខេត្តគោលដៅចំនួន ៤គឺ៖ រាជធានីភ្នំពេញ, ខេត្តកំពង់ចាម, ខេត្តសៀមរាប និងខេត្តកំពត។

ចំណែកការរៀបចំកម្មវិធីថ្ងៃនេះដែរ​ ក៏មានមតិចំណាប់អារម្មណ៍ និងចែករំលែកបទពិសោធន៍ របស់សហគ្រិនឆ្នើមទាំង ៤ និងមានការប្រគល់ពាន​សញ្ញាប័ត្រ​ដល់សហគ្រិនទាំង១០នាក់ ដែលបានចូលរួមវគ្គបណ្តុះបណ្តាលផងដែរ៕អត្ថបទ៖ សុន រ៉ាឌី