ចាប់ពីថ្ងៃទី១៥ ដល់ថ្ងៃទី២៨ ខែសីហា ឆ្នាំ២០២៦ ទីក្រុងអ៊ូឡង់បាទ័រ ប្រទេស​ម៉ុងហ្គោលី បានរៀបចំប្រជុំដ៏សំខាន់សម្រាប់សហគមន៍អន្តរជាតិ ក្នុងការចូលរួម​សន្និសីទកំពូលលើកទី១៧ នៃអនុសញ្ញាសហប្រជា​ជាតិ ដើម្បីប្រយុទ្ធប្រឆាំង​នឹងរហោស្ថានកម្ម (UNCCD COP17)​ ក្រោមប្រធានបទ "ការស្តារដីឡើងវិញ ការស្តារក្តីសង្ឃឹមឡើងវិញ​ (Restoring Land, Restoring Hope)"។

ក្នុងឱកាសនោះប្រតិភូជាន់ខ្ពស់ និងប្រតិភូបច្ចេកទេសកម្ពុជា ដឹកនាំដោយ​ឯកឧត្តម កែវ អូម៉ាលីស្ស រដ្ឋលេខាធិការ លោកជំទាវ យ៉ើ អាស៊ីគីន អនុរដ្ឋ​លេខា​ធិការក្រសួងកសិកម្ម រុក្ខាប្រមាញ់ និង​នេសាទ បានចូលរួមក្នុង​ព្រឹត្តិការណ៍​ជាប្រវត្តិសាស្រ្តនេះ ដើម្បីបង្ហាញពីការ​ប្តេជ្ញាចិត្តរបស់កម្ពុជា ក្នុងការគ្រប់គ្រង និងប្រើប្រាស់ធនធានដីប្រកប​ដោយ​និរន្តរភាព ព្រមទាំងពង្រឹងកិច្ចសហប្រតិ​បត្តិការ​ជាមួយសហគមន៍អន្តរជាតិ។

សូមជម្រាបថា សន្និសីទ UNCCD COP17 បានប្រមូលផ្តុំតំណាងមកពីរដ្ឋភាគី​ចំនួន ១៩៧ប្រទេស ដែលរួមមាន៖ ប្រមុខរាជរដ្ឋាភិបាល អ្នកជំនាញ និងអ្នក​វិទ្យាសាស្ត្រ តំណាងវិស័យឯកជន អង្គការសង្គមស៊ីវិល និងដៃគូអភិវឌ្ឍន៍អន្តរ​ជាតិ។ កិច្ចប្រជុំនេះផ្តោតសំខាន់លើការពង្រឹងសកម្មភាពជាសកល ដើម្បីទប់​ស្កាត់ កាត់បន្ថយ និងបង្វែរស្ថានភាពធ្លាក់ចុះនៃគុណភាពដី ព្រមទាំងលើកកម្ពស់​ការស្តារ និងអភិរក្សធនធានដី និងប្រព័ន្ធអេកូឡូស៊ី។ ទន្ទឹមនឹងនេះ កិច្ចប្រជុំក៏​បាន​​ផ្តោត​លើការធានាសន្តិសុខស្បៀងសកល និងការការពារធនធាន​ធម្មជាតិ​លើដី និងក្រោមដី ដែលជាគ្រឹះទ្រទ្រង់ជីវិត និងទប់ទល់នឹងការប្រែប្រួល​អាកា​ស​ធាតុ ទាំងបច្ចុប្បន្ន និងអនាគត។

ជាមួយគ្នានេះ តាមរយៈការចូលរួមយ៉ាងសកម្មក្នុងសន្និសីទ COP17 កម្ពុជាមាន​គោលដៅ​យុទ្ធសាស្ត្រក្នុងការពង្រឹងកិច្ចសហប្រតិបត្តិការ និងកសាងសម្ព័ន្ធភាព​រឹងមាំ​ជាមួយដៃគូពហុភាគី និងសហគមន៍អន្តរជាតិ។ បន្ថែមពីនេះ កម្ពុជារំពឹងថា​នឹ​ងស្រូបយកបទពិសោធន៍ជោគជ័យ បច្ចេកវិទ្យា និងវិទ្យាសាស្ត្រទំនើបៗ​លើការ​គ្រប់​គ្រងដីប្រកបដោយនិរន្តរភាព ព្រមទាំងកៀរគរប្រភពទុន និងហិរញ្ញប្បទាន​បៃតង​បន្ថែមទៀត ដើម្បីជំរុញការអនុវត្តគម្រោងស្តារគុណភាពដី និងការអភិវឌ្ឍ​វិស័យកសិកម្មកម្ពុជាឱ្យកាន់តែមានចីរភាព និងប្រសិទ្ធភាពខ្ពស់៕