ប្រជាកសិករផលិតខ្នាតតូច ដែលទទួលបានការគាំទ្រពីគម្រោងជំរុញទីផ្សារសម្រាប់កសិកម្មខ្នាតតូច(អេមស៍) របស់ក្រសួងពាណិជ្ជកម្ម បានអះអាងថា ជីវភាព និង​មុខរបររបស់ពួកគាត់មានភាពប្រសើរឡើង ខណៈការលក់ផលិតផលនានាក្នុងស្រុកកាន់តែមានទីផ្សារ ជាពិសេសនៅពេលទទួលបានឱកាសចូលរួមលក់ដូរនៅ «ផ្សារផលិតផលខ្មែរ» ដែលរៀបចំដោយក្រុមការងារគម្រោងអេមស៍ នៃមន្ទីរពាណិជ្ជកម្មខេត្តកំពង់ចាម នៅរៀងរាល់ចុងសប្តាហ៍។

លោក ឈាង បូរិន ប្រធានមន្ទីរពាណិជ្ជកម្មខេត្តកំពង់ចាម និងជាប្រធានគ្រប់គ្រងគម្រោង អេមស៍ ថ្នាក់ខេត្ត ក្នុងពិធីសម្ពោធបើក «យុទ្ធនាការផលិតផលជាតិ #MadeInCambodia» ដែលត្រូវបានរៀបចំរួមគ្នាជាមួយ «ផ្សារផលិតផលខ្មែរ» ក្នុងខេត្តកំពង់ចាម កាលពីកន្លងទៅនេះ បានបង្ហាញសុទិដ្ឋិនិយម​ចំពោះលទ្ធ​ផល ដែល​ទទួល​បានពីការអនុវត្តគម្រោង ដោយបញ្ជាក់ថា កសិករចំនួនជាង ៧ ៨០០គ្រួសារ បានទទួលការគាំទ្រពីគម្រោង ជាពិ​សេ​សតាមរយៈការសម្របសម្រួលរវាងវិស័យឯកជន ក្រុមអ្នកផលិត និងភាគីពាក់ព័ន្ធ ដើម្បីពង្រឹង និងអភិវឌ្ឍខ្សែច្រវាក់តម្លៃ និងទីផ្សារកសិកម្ម។

 លោកបានបន្តថា តាមរយៈការគាំទ្ររបស់គម្រោង អេមស៍ ជីវភាពរបស់ប្រជាពលរដ្ឋដែលជាកសិករខ្នាតតូច និងជាអាជីវករ មានភាពប្រសើរឡើងជាងមុន ព្រោះពួកគាត់ទទួលបានឱកាសភ្ជាប់ទៅកាន់ទីផ្សារកាន់​តែ​ច្រើ​ន និងមានការសម្របសម្រួលជាមួយអ្នកទិញ និងវិស័យឯកជន។

ក្រុមកសិករខេត្តកំពង់ចាម បានលើកឡើងថា ការចូលរួមក្នុងគម្រោង អេមស៍ បានផ្តល់ឱកាសឱ្យមានកន្លែងលក់ផលិតផលជាក់លាក់ និងអាចជួបអតិថិជនដោយផ្ទាល់។ ពួកគាត់ បានឱ្យដឹងស្រដៀងគ្នាទៀតថា ពីមុនពិតជាមានការព្រួយបារម្ភអំពីទីផ្សារ ពេលផលិតផលបានហើយ មិនដឹងថាត្រូវយក​ទៅលក់​នៅទី​ណា ឬលក់ឱ្យអ្នកណាទេ។ ប៉ុន្តែ បន្ទាប់ពីបានចូលរួមក្នុងផ្សារផលិតផលខ្មែរ គឺបានជួយឱ្យយើងមានឱកាសបង្ហាញផលិតផល និងលក់ដោយផ្ទាល់ទៅអតិថិជន។

យុទ្ធនាការផលិតផលជាតិ បង្កើតឡើងក្នុងគោលបំណងពង្រីកទីផ្សារក្នុងស្រុក បង្កើតឱកាសឱ្យអ្នកផលិត សហគ្រាសមីក្រូធុនតូច និងមធ្យម បានដាក់បង្ហាញ និងលក់ផលិផលដោយផ្ទាល់ សំដៅលើកកម្ពស់មោទនភាពជាតិ «បណ្តុះទំលាប់ខ្មែរជួយខ្មែរ» និងបង្កើនទំនុកចិត្តលើគុណភាពផលិតផលជាតិ ព្រមទាំងតភ្ជាប់បណ្តាញអាជីវកម្ម និងជាវេទិកាជួបជុំផលិតករ និងអ្នកចែកចាយក្នុងតំបន់។ សូមបញ្ជាក់ថា គម្រោងជំរុញទីផ្សារសម្រាប់កសិកម្មខ្នាតតូច (អេមស៍) គឺជាគម្រោងអនុវត្តដោយ ក្រសួងពាណិជ្ជកម្ម នៅក្នុងខេត្តគោលដៅចំនួន១៨ ដែលជាគំនិតផ្តួចផ្តើមរួមគ្នារបស់រាជរដ្ឋាភិបាលកម្ពុជា និងមូលនិធិអន្តរជាតិសម្រាប់ការអភិវឌ្ឍកសិកម្ម ក្នុងគោលបំណង ជំរុញកំណើនទីផ្សារប្រកបដោយបរិយាបន្ន សម្រាប់ផលិតផលកសិកម្មដែលមានតម្លៃខ្ពស់ និងការអភិវឌ្ឍចង្កោមអាជីវកម្មតាមជនបទ ដែលអ្នកផលិតជាក្រុមកសិករខ្នាតតូច ក្នុងនោះកសិករក្រីក្រ ក៏អាចទទួលបានផលប្រយោជន៍រួមគ្នា៕អត្ថបទ៖ ឈិត បូរ៉ាវី