សម្ដេចមហាបវរធិបតី ហ៊ុន ម៉ាណែត នាយកដ្ឋមន្រ្ដីនៃកម្ពុជា ប្រកាសស្វាគមន៍រាល់បញ្ញវន្ត និងអ្នកនយោបាយដែលមានឆន្ទៈចូលរួមផ្ដល់មតិយោបល់ និងគំនិតដើម្បីកសាង អភិវឌ្ឍប្រទេសជាតិ ទោះបីជាពួកគេមិនចូលរួមជាមួយគណបក្សប្រជាជនក៏ដោយ។

សម្ដេចធិបតី នាយករដ្ឋមន្រ្ដី បានប្រកាសស្វាគមន៍បែបនេះក្នុងឱកាស អញ្ជើញជាអធិបតីភាពដ៏ខ្ពង់ខ្ពស់ក្នុងពិធីសំណេះសំណាលជាមួយអាចារ្យ អាចារិនីទូទាំងប្រទេស លើកទី១១ នៅព្រឹកថ្ងៃទី១៩ ខែសីហា ឆ្នាំ២០២៦នេះ។

ក្នុងឱកាសនោះសម្ដេចធិបតីបានថ្លែងថា កាលពីពេលថ្មីៗនេះសម្ដេចបានជួបជាមួយអ្នកវិភាគសង្គម អ្នកនយោបាយជើងចាស់ម្នាក់ ហើយអ្នកនយោបាយនោះសួរសម្ដេចថា បើមានបញ្ញវន្តទាំងនៅក្នុងប្រទេស និងនៅក្រៅប្រទេសច្រើន ដែលមិននៅក្នុងជួររាជរដ្ឋាភិបាលទេ ហើយគេចង់ជួយជាគំនិត យោបល់ ទៅលើប្រធានបទមួយចំនួនដែលគេចាប់អារម្មណ៍ តើសម្ដេចទទួលឬអត់?

សម្ដេចឆ្លើយតបថា សម្ដេចមិនដែលអត់ទទួលទេ! សម្ដេចធិបតីបញ្ជាក់ថា បើមានហេតុផលត្រឹមត្រូវ កុំឱ្យតែជេរយកៗបែបនេះ សម្ដេចមិនស្ដាប់ទេ។ តែបើអ្នកវិភាគច្បាស់លាស់ ផ្អែកលើមូលដ្ឋាន អត់ចាំបាច់ស្របជាមួយរដ្ឋាភិបាល ឬគណបក្សប្រជាជនទេ គឺរដ្ឋាភិបាល និងសម្ដេចចង់បាននូវចំណុចខ្វះខាតដើម្បីពង្រឹងដែលនេះគឺជាចំណុចល្អ, ពីព្រោះចំណុចស្រប សម្ដេចដឹងហើយហើយគោលនយោបាយសម្ដេចអ្នកដាក់, ប៉ុន្ដែសម្ដេចចង់បានការវាយតម្លៃមួយដែលត្រឹមត្រូវ ច្បាស់លាស់ហើយសម្ដេចស្វាគមន៍ទាំងអស់។

ក្នុងឱកាសនោះ សម្ដេចធិបតី បានបញ្ជាក់ទៀតថា គណបក្សប្រជាជនកម្ពុជា ដឹកនាំដោយសម្ដេចតេជោ ហ៊ុន សែន ប្រធានគណបក្ស បានដាក់ចេញនូវគោលនយោបាយ បង្រួបបង្រួម គឺនយោបាយ ឈ្នះ ឈ្នះ ។ នយោបាយនេះ កើតឡើងមិនមែនដោយសារការបិទច្រកទេ គឺដោយសារនយោបាយនៃការបង្រួបបង្រួម វប្បធម៌សន្ទនា ប៉ុន្ដែវប្បធម៌សុន្ទនាដើរ ទាល់តែមានការស្មោះត្រង់ ប្រកាន់គុណធម៌ គោរពគ្នាទៅវិញទៅមក កុំចាប់ដៃគ្នានៅភ្នំពេញឡើងទៅដល់បារាំងជេគ្នានោះ។

សម្ដេចធិបតី នាយករដ្ឋមន្រ្ដីចាត់ទុកសកម្មភាពជេ និងជាន់បន្លិចរបស់ក្រុមអ្នកនយោបាយក្រៅស្រុកមួយក្ដាប់តូច គឺមានផ្នត់គំនិតចង្អៀតចង្អល់ គ្មានផ្នត់គំនិតបង្រួបបង្រួមជាតិនោះទេ។ សម្ដេចផ្ញើសារទៅក្រុមប្រឆាំងមួយក្ដាប់តូចនោះឱ្យធ្វើនយោបាយដោយឆន្ទៈពិតប្រាកដ កុំងាកជេៗ ខណៈបើមានឆន្ទៈពិតប្រាកដ គោរពគ្នាទៅវិញទៅមក នេះគឺជាវប្បធម៌នៃការបង្រួបបង្រួមគ្នាពិតប្រាកដហើយសម្ដេចនឹងស្វាគមន៍។ សម្ដេចធិបតីបញ្ជាក់ថា៖«បើជួបអត់ជេ បើជេអត់ជួប»៕