បន្ទាប់ពីលោកជំទាវ កឹម មនោវិទ្យា ត្រូវបានតែងតាំងជាប្រេសិតពិសេសរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា អ្នកនយោបាយនៅក្នុងប្រទេសកម្ពុជា បានចាត់ទុកការតែងតាំងលោកជំទាវ កឹម មនោវិទ្យា ដែលត្រូវជាកូនស្រីលោក កឹម សុខា អតីតគណបក្សប្រឆាំង ជាស្មារតីរួបរួមខ្មែរតែមួយ ដើម្បីផលប្រយោជន៍ប្រទេសជាតិ ស្របពេលដែលប្រទេសថៃបង្កសង្គ្រាមឈ្លានពានកម្ពុជា។

លោកជំទាវ ពោធិតី សាវត្ថី ប្រធានគណបក្សធម្មាធិបតេយ្យ នៅថ្ងៃទី១៩ ខែសីហា ឆ្នាំ២០២៦នេះ បានប្រាប់BTVថា ខ្ញុំសូមចូលរួមអបអរសារទក្នុងការសម្រេចចិត្តដ៏ត្រឹមត្រូវរបស់លោកជំទាវ កឹម មនោវិទ្យា ដែលបានចូលរួមក្នុងជួររាជរដ្ឋាភិបាល ដោយត្រូវបានតែងតាំងជាប្រេសិតពិសេសរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា។ការចូលរួមរបស់លោកជំទាវនេះ គឺបង្ហាញពីឆន្ទៈស្នេហាជាតិ និងជាស្មារតីរួបរួមខ្មែរតែមួយ ស្របពេលដែលប្រទេសថៃបង្កសង្គ្រាមឈ្លានពានកម្ពុជា។ លោកជំទាវបន្តថា រាជរដ្ឋាភិបាលកម្ពុជាតែងតែបើកចិត្តទទួលខ្មែរទាំងអស់ គ្រប់និន្នាការនយោបាយដែលមានឆន្ទៈបំរើប្រទេសជាតិ ហើយការួបរួមខ្មែរតែមួយនេះ ជាកម្លាំងចលករដ៏រឹងមាំការពារប្រទេសជាតិពីសត្រូវ។

លោក អ៊ិត សារម្យ ប្រធានគណបក្សបំណងពលរដ្ឋ បានលើកឡើងដែរថា រាជរដ្ឋាភិបាល ក្រោមការដឹកនាំរបស់គណបក្សប្រជាជនកម្ពុជា តែងតែផ្តល់ឱកាសឱ្យកូនខ្មែរចូលរួមចំណែក ដែលមានធនធាន សមត្ថភាព ចូលរួមក្នុងកិច្ចការងារប្រទេសជាតិ ជាដំណើរមួយដ៏ត្រឹមត្រូវ និងជាគុណប្រយោជន៍សម្រាប់ប្រទេសជាតិនៅពេលអនាគត។ហើយចំពោះការលោកជំទាវ កឹម មនោវិទ្យា ត្រូវបានតែងតាំងជាប្រេសិតពិសេសរបស់នាយករដ្ឋមន្រ្តី គឺជាផ្នែកមួយនូវការប្រមូលធនធានមនុស្សក្នុងការកសាងអភិវឌ្ឍប្រទេសជាតិ។

កាលពីថ្ងៃទី១៧ខែសីហា ឆ្នាំ២០២៦ លោកជំទាវ កឹម មនោវិទ្យា ត្រូវបានព្រះមហាក្សត្រខ្មែរចេញព្រះរាជក្រឹត្យតែងតាំងជាប្រេសិតពិសេសរបស់សម្តេចមហាបរវធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា មានឋានៈស្មើរដ្ឋមន្រ្តី។ ការចេញព្រះរាជក្រឹត្យនេះ ធ្វើឡើងបន្ទាប់ពី លោក កឹម សុខា និងលោកជំទាវ កឹម មនោវិទ្យា ដែលជាត្រូវជាឳពុក និងកូនស្រី បានជួបសួរសុខទុក្ខជាមួយសម្តេចធិបតី ហ៊ុន ម៉ាណែត នាយករដ្ឋមន្រ្តី និងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា កាលពីថ្ងៃទី១៦ខែសីហា ឆ្នាំ២០២៦។ អត្ថបទ៖ ទូច សោភ័ណ