ភ្នំពេញ៖ ឯកឧត្តម សរ ចំរុង ប្រធានគណៈកម្មការសិទ្ធិមនុស្ស ទទួលពាក្យបណ្តឹងនិងអង្កេត និងអធិការកិច្ច (គណៈកម្មការទី១) នៃរដ្ឋសភា នាព្រឹកថ្ងៃទី១៩ ខែសីហា ឆ្នាំ២០២៦ នេះ បានដឹកនាំកិច្ចប្រជុំពិភាក្សាការងារជាមួយភាគីរាជរដ្ឋាភិបាល ដឹកនាំដោយ ឯកឧត្តម កែវ រ៉េមី ទេសរដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា។

ជំនួបពិភាក្សាការងារដែលរៀបចំធ្វើនៅវិមានរដ្ឋសភានេះធ្វើឡើងដើម្បីពិនិត្យលើវឌ្ឍនភាព និងបញ្ហាប្រឈម សំដៅរិះរកយន្តការរួមជួយគាំទ្រគ្នាទៅវិញទៅមក ក្នុងការពង្រឹងកិច្ចការពារសិទ្ធិសេរីភាពរបស់ប្រជាពលរដ្ឋ ស្របតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ក្នុងឱកាសនោះ ឯកឧត្តម សរ ចំរុង បានវាយតម្លៃខ្ពស់ចំពោះតួនាទីរបស់គណៈកម្មាធិការសិទ្ធិមនុស្សកម្ពុជា ក្នុងនាមជាសេនាធិការដ៏សំខាន់របស់រាជរដ្ឋាភិបាល លើការលើកស្ទួយ ការពារ និងគោរពសិទ្ធិមនុស្ស ទាំងក្នុងវិស័យនយោបាយ សេដ្ឋកិច្ច សង្គមកិច្ច និងវប្បធម៌។

ជាមួយគ្នានេះ ប្រធានគណៈកម្មការទី១ នៃរដ្ឋសភា ក៏បានគូសបញ្ជាក់អំពីសមិទ្ធផលនានាដែលរដ្ឋសភាសម្រេចបានក្នុងការងារពង្រឹងក្របខណ្ឌច្បាប់ ដោយចាប់តាំងពីនីតិកាលទី១ រហូតដល់នីតិកាលទី៧ នេះ រដ្ឋសភាបានអនុម័តច្បាប់សរុបចំនួន ៧៨៤ ច្បាប់ ដើម្បីបម្រើផលប្រយោជន៍ជាតិ និងប្រជាពលរដ្ឋ។ ក្នុងនោះ គណៈកម្មការទី១ បានពិនិត្យ និងសិក្សាលើសេចក្តីព្រាងច្បាប់សំខាន់ៗពាក់ព័ន្ធនឹងវិស័យសិទ្ធិមនុស្ស រួមមាន៖

-​ ច្បាប់ស្តីពីការអនុម័តយល់ព្រមឱ្យព្រះរាជាណាចក្រកម្ពុជាចូលជាភាគីនៃពិធីសារបន្ថែម នៃអនុសញ្ញាស្តីពីការប្រឆាំងទារុណកម្ម និងការប្រព្រឹត្ត ឬទណ្ឌកម្មឯទៀតដែលឃោរឃៅ អមនុស្សធម៌ ឬថោកទាប

-​ ច្បាប់ស្តីពីការអនុម័តយល់ព្រមឱ្យព្រះរាជាណាចក្រកម្ពុជាចូលជាភាគីនៃអនុសញ្ញាអង្គការសហប្រជាជាតិ ស្តីពីសិទ្ធិជនពិការជាដើម

ជាការឆ្លើយតប ឯកឧត្តម កែវ រ៉េមី បានជម្រាបជូនអំពីយន្តការការពារសិទ្ធិពលរដ្ឋ តាមរយៈការទទួលពាក្យបណ្តឹងផ្ទាល់ ប្រព័ន្ធបច្ចេកវិទ្យាទូរសព្ទដៃ «CHRC App» ការតាមដានបញ្ហាសិទ្ធិមនុស្សលើបណ្តាញសង្គម និងការបន្តផ្សព្វផ្សាយអប់រំច្បាប់ឱ្យកាន់តែទូលំទូលាយ។

ទន្ទឹមនឹងនេះ ឯកឧត្តមក៏បានរំឭកពីសកម្មភាពការពារសិទ្ធិពលរដ្ឋកម្ពុជាក្នុងអំឡុងពេលមានការឈ្លានពានពីភាគីថៃ ដែលកន្លងមកគណៈកម្មាធិការបានចេញលិខិតថ្កោលទោស លិខិតបណ្តឹង និងសេចក្តីថ្លែងការណ៍សរុបចំនួន ៦០ករណីផងដែរ។