ភ្នំពេញ៖ អគ្គស្នងការដ្ឋាននគរបាលជាតិបានបើកកិច្ចប្រជុំពង្រឹងលើការអនុវត្តរឹតបន្តឹងច្បាប់ស្ដីពីចរាចរណ៍ផ្លូវគោក នៅថ្ងៃទី១៩ ខែសីហា ឆ្នាំ២០២៦ នៅទីស្ដីការក្រសួងមហាផ្ទៃ ដោយមានការចូលរួមពីស្នងការនគរបាលរាជធានី ខេត្ត រួមទាំងមន្ត្រីជំនាញដែលពាក់ព័ន្ធ។

ឯកឧត្តម ឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិទទួលផែនចរាចរណ៍បានថ្លែងថា ការអនុវត្តរឹតបន្តឹងច្បាប់ស្តីពីការចរាចរណ៍ផ្លូវគោកនឹងចាប់ផ្តើមនៅថ្ងៃទី១ ខែកញ្ញា ឆ្នាំ២០២៦ ខាងមុខនេះ ដោយពិនិត្យឃើញថា ឆមាសទី១ ឆ្នាំ២០២៦ នេះ កំណើននៃគ្រោះថ្នាក់ចរាចរណ៍បានកើនឡើងយ៉ាងគំហុកដែលកើតឡើងចំនួន ១២៧៩ករណី និងបណ្តាលឲ្យមានអ្នកស្លាប់ចំនួន ៧៧៣នាក់ និងរបួស ១៩៤៤នាក់។ ដោយឃើញស្ថានភាពគ្រោះថ្នាក់ចរាចរណ៍យ៉ាងគំហុកបែបនេះ ទើបប្រមុខរាជរដ្ឋាភិបាលបានឯកភាពឲ្យមានការរឹតបន្តឹងច្បាប់ស្តីពីចរាចរណ៍ផ្លូវគោក។

ឯកឧត្តម ឧត្តមសេនីយ៍ឯក ចេវ ហាក់ បានបញ្ជាក់ថា ៖ ក្នុងនោះយើងបានជ្រើសរើសខេត្តចំនួន ៥ ដែលមានតួលេខកំណើនគ្រោះថ្នាក់ចរាចរណ៍ខ្ពស់ជាងគេក្នុង២៥រាជធានិ ខេត្ត ដើម្បីធ្វើការរិតបន្តឹងមានដូចជា រាជធានីភ្នំពេញ ខេត្តព្រះសីហនុ ខេត្តកំពង់ស្ពឺ ខេត្តកណ្តាល និងខេត្តស្វាយរៀង។ ការអនុវត្តរិតបន្តឹងច្បាប់ គឺជាចំណុចមួយដែលក្នុងចំណោមបទល្មើសទាំងអស់ គឺយើងផ្តោតទៅលើមូលហេតុជាចម្បង គឺការប្រើប្រាស់ល្បឿនលើសកំណត់ ការមិនគោរពសិទ្ធិអាទិភាព បើកបរក្នុងស្ថានភាពស្រវឹង ដឹកសំពីងសំពោង ការមិនគោរពសិទ្ធិអាទិភាពជាចំណុចដែលបង្កឲ្យមានគ្រោះថ្នាក់ខ្ពស់ផងដែរ។ ក្រៅពិខេត្តទាំង៥នេះ គឺខេត្តដទៃទៀតក៏បាននឹងកំពុងធ្វើដូចគ្នាបន្តរឹតបន្តឹងលើការងារអប់រំ។

ជាមួយគ្នា ឯកឧត្តម ឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិទទួលផែនចរាចរណ៍អំពាវនាវឲ្យប្រជាពលរដ្ឋដែលប្រើប្រាស់ផ្លូវទាំងអស់ចូលរួមគោរពច្បាប់ស្តីពីចរាចរណ៍ផ្លូវគោកដើម្បីកាត់បន្ថយគ្រោះថ្នាក់ចរាចរណ៍៕ អត្ថបទ : វង្ស សុភាព