ស្វាយរៀង៖ នៅឆ្នាំ២០២៣ ខាងមុខប្រជាពលរដ្ឋនៅក្នុងស្រុកកំពុងរោទិ៍ ស្រុករំដួល និងស្រុកស្វាយជ្រុំ ខេត្តស្វាយរៀង នឹងទទួលបានសមិទ្ធផលផ្លូវក្រាលបេតុងប្រភេទ DBST ថ្មីចំនួន៤ខ្សែ ពីរាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ ដែលខ្សែផ្លូវថ្មីនេះនឹងរួមចំណែកយ៉ាង សំខាន់ដល់ការធ្វើដំណើរ និងដឹកជញ្ជូនកសិផល ដើម្បីលើកកម្ពស់សេដ្ឋកិច្ចមូលដ្ឋានកាន់តែ ល្អប្រសើរ។

ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ នាថ្ងៃទី១០ ខែឧសភា ឆ្នាំ ២០២២នេះ បានដឹកនាំក្រុមការងារក្រសួងរួមមាន ឯកឧត្តមបណ្ឌិត ចាន់ ដារ៉ុង រដ្ឋលេខាធិការ ឯកឧត្តមបណ្ឌិត សួស គង់ រដ្ឋលេខាធិការប្រចាំការ, ឯកឧត្តម ភួង សោភា រដ្ឋលេខាធិការ, ព្រមទាំងមានការចូលរួមពី ឯកឧត្តម តូច ប៉ូលីវ៉ា អភិបាលរងខេត្តស្វាយរៀង រួមនឹងទីប្រឹក្សាគម្រោង និងមន្រ្តីបច្ចេកទេសគម្រោង បានចុះពិនិត្យនិងវាយតម្លៃ​ការដ្ឋាន​ស្ថាបនា​ខ្សែផ្លូវទាំង ៤ ព្រមទាំង​បាន​ជួបសំណេះ​សំណាល​ជាមួយ​បងប្អូន​ប្រជាពលរដ្ឋ​នៅក្នុងភូមិដែល​រស់នៅតាមបណ្ដោយផ្លូវ ហើយ​ពួកគាត់​បាន​បង្ហាញ​ក្ដី​ត្រេកអរ​ចំពោះ​សមិទ្ធផល​ដែល​ទទួលបាននេះ។

គួរ​ជម្រាប​ជូន​ថា ​គម្រោង​ស្ថាបនា​ផ្លូវ​ជនបទ​ចំនួន ​៤ខ្សែ ដែល​មាន​ប្រវែង​សរុប ៥៧,២០ គីឡូម៉ែត្រ ក្នុង​ខេត្តស្វាយរៀង ​សម្រេច​បាន​លទ្ធផលប្រមាណ​ ៦០%ហើយ ​ដែល​នឹង​បញ្ចប់​ការ​ស្ថាបនា រួចរាល់​ជាស្ថាពរនាឆ្នាំ ២០២៣ខាងមុខ។ ការស្ថាបនាកែលម្អផ្លូវទាំង៤ខ្សែនេះ ទទួលបាន​ថវិកា​គំាទ្រ​ពីធនាគារ​អភិវឌ្ឍន៍អាស៊ី ADB , ​ធនាគារ​អាហរ័ណ​នីហរ័ណ​ នៃសាធារណរដ្ឋកូរ៉េ​ រួម​ទាំង​ថវិកា បដិភាគ​ពី​រដ្ឋរាជរដ្ឋាភិបាលកម្ពុជា៕