ភ្នំពេញ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានអនុញ្ញាតឲ្យលោកជំទាវ Colonne Appuhamillage Chaminda Inoka Colonne ឯកអគ្គរដ្ឋទូតស្រីលង្កា(Sri Lanka) តែងតាំងថ្មីប្រចាំកម្ពុជា ចូលជួបសម្តែងការគួរសម និងពិភាក្សាការងារលើទិសដៅជំរុញវិស័យវប្បធម៌ និងទេសចរណ៍ នាទីសី្តក្រសួងព្រឹកថ្ងៃទី១០ ខែឧសភា ឆ្នាំ២០២២នេះ។

លោកជំទាវរដ្ឋមន្រី្ត បានលើកឡើងថា ស្រីលង្កាជាប្រទេសកាន់ព្រះពុទ្ធសាសនា ទន្ទឹមនោះ​វប្បធម៌​រវាង​ប្រទេសទាំងពីរកម្ពុជា-ស្រីលង្កា ​គឺមានទំនាក់ទំនង​ជាមួយគ្នាយូរលង់ណាស់មកហើយ។ ជាពិសេស​មុនវិបតិ្តកូវីដ-១៩ ​មានភ្ញៀវទេសចរជាច្រើន បូករួមទាំងប្រជាជនកម្ពុជាផងដែរនោះ បានអញ្ជើញទស្សនកិច្ចនៅស្រីលង្កា​ ដែលពាក់ព័ន្ធនឹងវិស័យព្រះពុទ្ធសាសនា ​ក្នុងនោះកម្ពុជា ក៏មាន​បំណងឲ្យស្រីលង្កា អញ្ជើញមកទស្សនកិច្ចនៅកម្ពុជា លើវិស័យវប្បធម៌ផងដែរ។ ដូច្នេះសម្រាប់សក្តានុពលកម្ពុជា គឺមានប្រាង្គប្រាសាទជាច្រើន។

តាមរយៈជំនួបទ្វេរភាគីនេះ លោកជំទាវ រដ្ឋមន្រី្ត និងលោកជំទាវ ឯកអគ្គរដ្ឋទូត បានពិភាក្សា​និង​ផ្លាស់ប្តូរបទពិសោធន៍គ្នាជាច្រើន ដូចជា៖ លើវិស័យភាពយន្ត សិល្បៈ ជាពិសេសក្នុងឆ្នាំ២០២២នេះ កម្ពុជា-ស្រីលង្កា សិក្សាលើ​ទិដ្ឋភាព​រួម ​ក្នុងការ​ប្រារព្ធពិធី​អបអរ​សាទរ​ខួបការ​ទូត​រវាង​ប្រទេស​ទាំង​ពីរ។

ជាមួយគ្នានោះលោកជំទាវ ឯកអគ្គរដ្ឋទូតស្រីលង្កា ​មានបំណងចង់ឲ្យប្រជាជន ​និងប្រជាជនរវាង​ប្រទេស​ទាំងពីរ ​បានស្វែងយល់ពីគ្នាទៅវិញទៅមក តាមរយៈវិស័យវប្បធម៌។ ដូច្នេះមុនឈាន​ដល់​ការជំរុញកំណើនទេសចរណ៍ពីប្រទេសស្រីលង្កា​ មកកាន់ព្រះរាជាណាចក្រកម្ពុជា ​លោកជំទាវ ឯកអគ្គរដ្ឋទូត​ ស្នើសុំជាឯកសារ ​និងរូបភាពផ្សេងៗពាក់ព័ន្ធនិងវិស័យវប្បធម៌ ដែលអាចយក​ទៅ​ផ្សព្វផ្សាយ​នៅប្រទេសស្រីលង្កា ​បង្ហាញ​ពីសក្តានុពលវប្បធម៌​ និងទេសចរណ៍របស់ប្រទេសកម្ពុជា។

ជាការឆ្លើយតបលោកជំទាវ ​បណ្ឌិតសភាចារ្យ ភឿង សកុណា ​សូម​ស្វាគមន៍​ចំពោះគំនិត​ផ្តួចផ្តើម​របស់លោកជំទាវ ​ឯកអគ្គរដ្ឋទូតស្រីលង្កា ​ព្រោះថា នេះជាផ្នែកមួយក្នុងការជំរុញ មិនថា​តែ​ការយល់ដឹងអំពីវប្បធម៌ផងទេ​ ក៏ជាផ្នែកមួយនៃការជំរុញលើទេសចរណ៍វប្បធម៌ ដែលជាផ្នែក​មួយក្នុងការលើកស្ទួយសេដ្ឋកិច្ចរបស់ប្រជាជនផងដែរ៕ អត្ថបទ រដ្ឋា