ភ្នំពេញ៖ ក្រសួងមហាផ្ទៃផ្សព្វផ្សាយប្រកាសចំនួន ៣ គឺប្រកាសស្តីពីការកំណត់ចំនួនមុខតំណែងរង ក្នុងរចនាសម្ព័ន្ធអង្គភាពនគរបាលជាតិ និងពន្ធនាគារ ប្រកាសស្តីពីការកំណត់ចំនួនស្នងការរង នាយរងការិយាល័យ អធិការរង នាយរងផ្នែក និងនាយរងប៉ុស្តិ៍នគរបាលរដ្ឋបាល ចំណុះស្នងការដ្ឋាននគរបាលរាជធានី ខេត្ត និងប្រកាសស្តីពីការកំណត់លក្ខខណ្ឌចាត់មន្ត្រីរាជការ និងសិស្ស និស្សិតនគរបាល ទៅសិក្សាក្នុងនិងក្រៅប្រទេស នារសៀលថ្ងៃទី១៩ ខែសីហា ឆ្នាំ២០២៦នេះ។

ការផ្សព្វផ្សាយប្រកាសទាំងបីរបស់ក្រសួងមហាផ្ទៃ គឺជាជំហានមួយដ៏មានសារសំខាន់ក្នុងការរៀបចំនៅយុទ្ធសាស្ត្រ ការលើកកម្ពស់អភិបាលកិច្ចល្អ ការពង្រឹងប្រសិទ្ធភាពការងារស្ថាប័ន ក៏ដូចជាការធ្វើកំណែទម្រង់ ក៏ដូចជាការធ្វើកំណែទម្រង់រចនាសម្ព័ន្ធគ្រប់គ្រងធនធានមនុស្ស ដើម្បីឆ្លើយតបផែនការយុទ្ធសាស្ត្រស្តីពីការគ្រប់គ្រង ការអភិវឌ្ឍន៍ធនធានមនុស្ស ដែលជាការកំណែទម្រង់ធនធានមនុស្សស្របទៅតាមកម្មវិធីនយោបាយ គឺយុទ្ធសាស្ត្របច្ចកោណដំណាក់កាលទី១ របស់រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃនិងប៉ិនប្រសព្វរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលបានកំណត់យកមនុស្សជាការងារអាទិភាពទី១ ក្នុងចំណោមអាទិភាពផ្សេងៗទៀត។ ការពង្រឹងសមត្ថភាពវិជ្ជាជីវៈ និងការរៀបចំន្ត្រីបន្តវេន គឺជាគន្លឹះសំខាន់ក្នុងការលើកកម្ពស់ប្រសិទ្ធភាពបមបេញការងារស្នូលទៅតាមរចនាសម្ព័ន្ធអង្គភាពនានាចំណុះក្រសួងមហាផ្ទៃ ដើម្បីថែរក្សាបាននៅសណ្តាប់ធ្នាប់សាធារណ សុវត្ថិភាពសង្គមជួយដល់ប្រជាពលរដ្ឋទូទាំងប្រទេសប្រកបដោយវឌ្ឍនភាពនិងចេរភាព។

ក្នុងឱកាសនោះ រដ្ឋមន្ត្រីក្រសួងមហាផ្ទៃបានផ្ដល់អនុសាសន៍ណែនាំ និងទិសដៅការងារសំខាន់ៗ ជូនអង្គពិធីដូចតទៅ៖៖

១- ស្នើប្រធានអង្គភាពពាក់ព័ន្ធទាំងអស់ត្រូវយកប្រកាសទាំងបីនេះ ជាមូលដ្ឋានគ្រឹះ ក្នុងការអនុវត្តការងារបុគ្គលិកទាក់ទងនឹងការតែងតាំងមុខតំណែង និងការចាត់បញ្ជូនមន្រ្តីទៅសិក្សាក្នុងនិងក្រៅប្រទេស ឱ្យទទួលបានប្រសិទ្ធភាពខ្ពស់។

២- ស្នើអង្គភាពទាំងអស់ត្រូវបន្តផ្សព្វផ្សាយប្រកាសទាំងបីនេះឱ្យបានទូលំទូលាយដល់មន្ត្រីទទួលបន្ទុកការងារធនធានមនុស្ស ដើម្បីបង្កើនការយល់ដឹង និងចូលរួមអនុវត្តប្រកបដោយស្មារតីទទួលខុសត្រូវខ្ពស់។

៣- ស្នើប្រធានអង្គភាពពាក់ព័ន្ធទាំងអស់ ត្រូវលុបបំបាត់ចោលទាំងស្រុងនូវការស្នើសុំតែងតាំងមុខតំណែងរងបន្ថែម ក្នុងរចនាសម្ព័ន្ធដែលមានចំនួនស្របតាមការកំណត់រួចហើយ។ ក្នុងករណីមានការស្នើសុំខុសគោលការណ៍កំណត់ អគ្គនាយកដ្ឋានធនធានមនុស្ស មិនត្រូវរៀបចំបែបបទនិងលើកយោបល់មកក្រសួងនោះទេ។

៤- ការជ្រើសរើសសិស្ស-និស្សិតនគរបាលបន្តវេន និងការចាត់បញ្ជូនមន្រ្តីរាជការទៅសិក្សាទាំងក្នុងនិងក្រៅប្រទេស ត្រូវធ្វើការវាយតម្លៃឱ្យបានហ្មត់ចត់ ដើម្បីផលិតបាននូវធនធានមនុស្សដែលមានគុណភាព និងសមត្ថភាពពិតប្រាកដក្រោយពីបញ្ចប់ការសិក្សាដោយជោគជ័យ។

៥- ចំពោះបណ្ឌិត្យសភានគរបាលកម្ពុជា និងសាលាជាតិរដ្ឋបាលមូលដ្ឋាន ត្រូវបន្តយកចិត្តទុកដាក់គ្រប់គ្រងនិងពង្រឹងគុណភាពបណ្ដុះបណ្ដាល ជាពិសេស យកចិត្តទុកដាក់ធ្វើបច្ចុប្បន្នភាពកម្មវិធីសិក្សា និងអភិវឌ្ឍសមត្ថភាពគ្រូបង្រៀន ឱ្យឆ្លើយតបទៅនឹងស្ថានភាពការងារបច្ចុប្បន្ននិងអនាគត។ ជាមួយគ្នានេះ ត្រូវធានាថា មន្ត្រីរាជការដែលបានឆ្លងកាត់វគ្គបណ្ដុះបណ្ដាលនានា ត្រូវទទួលបានចំណេះដឹងជំនាញពិតប្រាកដ ព្រមទាំងមានវិន័យនិងក្រមសីលធម៌វិជ្ជាជីវៈកាន់តែប្រសើរឡើងបន្ថែមទៀត។