​ហ្វីលីពីន៖ លោក Ferdinand Marcos Jr ដណ្តើមបាន​ជ័យជម្នះ​ដោយ​ងាយ​គួរឱ្យភ្ញាក់ផ្អើល នៅក្នុង​ការបោះឆ្នោតប្រធានាធិបតី​ហ្វីលីពីន​កាលពី​ថ្ងៃ​ចន្ទ ជា​ជ័យជម្នះ​លើកដំបូង​ដោយ​សំឡេង​ភាគច្រើនចាប់តាំងពី​បដិវត្តន៍​ឆ្នាំ១៩៨៦ ដែល​បាន​ផ្តួលរំលំ​របប​ផ្តាច់ការ​រយៈពេល​ ២​ទស​វត្សរ៍​របស់​ឪពុក​លោក​។​

​លទ្ធផល​សរុប​ក្រៅផ្លូវការ​បានបង្ហាញ​ថា ​លោក Marcos ទទួលបាន​សំឡេងគាំទ្រ​លើសពី ២៧.៥លានសំឡេង​ដែល​ត្រូវការ​សម្រាប់​សំឡេង​ភាគច្រើន ដោយ​កំណត់​ដំណាក់កាល​សម្រាប់​ការវិល​ត្រលប់មកកាន់​ការគ្រប់គ្រង​វិញ ​ដែលមិន​ស្មាន​ដល់​របស់​គ្រួសារ​លោក Marcos រយៈពេល ៣៦​ឆ្នាំ បន្ទាប់ពីការចាកចេញ​ដ៏​អាម៉ាស់​របស់ខ្លួន​ក្នុងការ​និរទេស ​អំឡុងពេល​ការបះបោរ​នៃ​អំណាច​ប្រជាជន​។ ​លោក Marcos បាន​ថ្លែង​ទៅកាន់​អ្នកគាំទ្រ​នៅក្នុង​សុន្ទរកថា​ដែល​ផ្សាយ​នៅលើ​បណ្តាញ​សង្គម Facebook ជា​វេទិកា​ស្នូល​នៃ​យុទ្ធសាស្ត្រ​នយោបាយ​របស់លោក​ថា យើង​មាន​កិច្ចការ​ជាច្រើន ដែលត្រូវធ្វើ ហើយ​ការខិតខំ​ប្រឹងប្រែង​ធំ​បែបនេះ​មិនមែន​ពាក់ព័ន្ធ​តែ​មនុស្ស​ម្នាក់​នោះទេ​។ យោងតាម​ការសរុប​ក្រៅផ្លូវការ​របស់​គណកម្មាធិកា​របោះ​ឆ្នោតបាន​ឲ្យ​ដឹងថា​ លោក Marcos Jr ទទួលបាន ២៩.៩លាន​សំឡេងមាន​ចំនួន​លើស​ទ្វេដង​នៃ​សំឡេងឆ្នោត​របស់លោក​ស្រី Leni Robredo ជា​អនុ​ប្រ​ធានាធិបតីដោយ​ស្មើរ​នឹង ៩៣​.៨​ភាគរយ​នៃ​សន្លឹកឆ្នោត​ដែល​បាន​រាប់​រួច​។

លទ្ធផល​ជា​ផ្លូវការ​ត្រូវបាន​រំពឹងថានឹង​ប្រកាស​នៅ​ដំណាច់ខែ​នេះ​។ គ្រួសារ​លោក Marcos បាន​ត្រឡប់ពី​ការ​រស់នៅក្នុង​និរទេស​ភាព​វិញនៅ​ទសវត្សរ៍​ឆ្នាំ១៩៩០​ ហើយ​នៅតែ​ជា​កម្លាំង​ដ៏​មាន​ឥទ្ធិពល​នៅក្នុង​នយោបាយ​ប្រទេស​ហ្វីលីពីន ដោយរក្សាបាន​នូវ​ឥទ្ធិពល​របស់ខ្លួន​តាម​រយៈ​ទ្រព្យសម្បត្តិ​ច្រើន និង​មាន​ទំនាក់ទំនង​ជាមួយ​មន្ត្រី​ដ៏​ច្រើន​ក្នុងប្រទេស​នេះ​។ លោក Marcos Jr បាន​បម្រើការ​ជា​អភិបាលក្រុង សមាជិកសភា និង​សមាជិក​ព្រឹទ្ធសភា ដែល​ប្អូនស្រី​របស់លោក​លោកស្រី Imee បច្ចុប្បន្ន​ជាសមាជិក​ព្រឹទ្ធសភា និង​ម្តាយ​លោកស្រី Imelda ជា​អ្នកមាន​ឥទ្ធិពល​ខ្លាំងក្នុង​កិច្ចការ​នយោបាយ និង​ជា​ស្ត្រី​មេម៉ាយ​ភរិយា​របស់អតីត​មេដឹកនាំ​ផ្តាច់ការបម្រើការ ៤​អាណត្តិ​នៅក្នុង​សភា៕

អត្ថបទ៖ ប៊ុនថន