បាត់ដំបង៖ ច្រកទ្វារព្រំដែនអន្តរជាតិកម្ពុជា-ថៃ ក្នុងភូមិសាស្រ្តខេត្តបាត់ដំបង ត្រូវបានបើកដំណើរការឡើងវិញ ប៉ុន្តែមិនសូវមានសកម្មភាពផុសផុលឡើយ ខណៈច្រកទ្វារតំបន់នៅបន្តបិទដដែល។

ច្រកទ្វារព្រំដែនអន្តរជាតិ ដែលត្រូវបានបើកឡើងវិញ នៅខេត្តបាត់ដំបង គឺច្រកដូង និងច្រកគីឡូ ១៣ ចំណែកច្រកទ្វារតំបន់ ដែលបន្តបិទមានច្រក៤០០ ច្រកអូរអន្លក់ (សួនស៊ុ) និងច្រកអូររំដួល។

លោក ឃឹម ទិព្វមុនី ប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិដូង ស្រុកកំរៀង បានឱ្យដឹងថា ទោះបីជាភាគីថៃ បានបើកច្រកទ្វារព្រំដែនសម្រាប់អ្នកដំណើរឆ្លងកាត់ ប៉ុន្តែមាន​ភ្ជាប់​លក្ខខណ្ឌ​ ស្មុគស្មាញ​ជាច្រើន។

លោក ណាត ចាន់រ៉េត ប្រធានទីស្នាក់ការត្រួតពិនិត្យច្រកទ្វារព្រំដែនតំបន់អូរអន្លក់ (សួនស៊ុ) បាន ឱ្យដឹងដែរថា រហូតមកដល់ពេលនេះ ច្រកទ្វារតំបន់មិនទាន់ត្រូវបាន​បើកឱ្យដំណើរ​ការឡើងវិញ​នោះឡើយ ប៉ុន្តែទោះជាយ៉ាងណា អាជ្ញាធរ និងកងកម្លាំងចម្រុះការពារព្រំដែន នៅបន្ត​ពង្រឹង​ការ​ត្រួតពិនិត្យ ​និងទប់ស្កាត់ការលបលួចឆ្លងដែនខុសច្បាប់ជាប់ជាប្រចាំ។

គោលការណ៍អនុវត្តសម្រាប់អ្នកធ្វើដំណើរចូលប្រទេសថៃ ​តាមច្រកទ្វារព្រំដែនអន្តរជាតិដូង-ឡែម ត្រូវភ្ជាប់លក្ខខណ្ឌមួយចំនួន ដូចជា អ្នកកាន់ប័ណ្ណព្រំដែន មានបំណងចូលត្រឹមរង្វង់ខេត្តប៉ុណ្ណោះ អាច ស្នាក់នៅមិនលើសពី៣ថ្ងៃ ​ត្រូវមានប័ណ្ណចាក់វ៉ាក់សាំងកូវីដ-១៩។ ចំណែកអ្នកកាន់លិខិតឆ្លងដែន ត្រូវមាន ប័ណ្ណចាក់វ៉ាក់សាំងកូវីដ-១៩ លិខិតធានារ៉ាប់រងសុខភាព រង្វង់ទឹកប្រាក់៣០ម៉ឺនបាត និងចុះឈ្មោះក្នុង ប្រព័ន្ធ THAILAND PASS៕ អត្ថបទ៖ នឿត សុភក្ត្រ