ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជននិងកីឡា កាលពីរាត្រីថ្ងៃទី២១សីហាម្សិលមិញ បានជួបសំណេះសំណាលជាមួយសិស្សានុសិស្សកម្ពុជាចំនួន១៣រូប ដែលបានទៅប្រឡង The Young Master Challenge Global Final 2026 នៅអង់គ្លេស និងទទួលបានមេដាយមាស៣គ្រឿង ប្រាក់៥គ្រឿងនិងមេដាយសំរឹទ្ធ៥គ្រឿងដើម្បីសំណេះសំណាលលើកទឹកចិត្ត។

ឯកឧត្តមបណ្ឌិត សភាចារ្យ ច័ន្ទ រ័ត្ន ទីប្រឹក្សាក្រសួងអប់រំ យុវជន និងកីឡា ទទួលបន្ទុកដេប៉ាតឺម៉ង់ស្រាវជ្រាវគរុកោសល្យជំនាន់ថ្មី នៃវិទ្យាស្ថានជាតិអប់រំ បានប្រាប់ថា ការជួបសំណេះសំណាលពីថ្នាក់ដឹកនាំនៅពេលនេះគឺដើម្បីលើកទឹកចិត្តឱ្យសិស្សានុសិស្សកម្ពុជា បន្តខិតខំរៀនសូត្របន្ថែមទៀត ពិសេសដើម្បីឱ្យសិស្សានុសិស្សដទៃទៀត បានយកជាគំរូ ដោយសារសិស្សានុសិស្សទំាង១៣រូបរបស់កម្ពុជា បានទៅចូលរួមប្រឡងកម្មវិធី The Young Master Challenge Global Final 2026 នៅចក្រភពអង់គ្លេស ពិតជាបានលើកកម្ពស់គុណភាពអប់រំយ៉ាងពិតប្រាកដ ព្រោះការប្រឡងនេះមានប្រទេសចំនួន៣១ប្រទេស ហើយសិស្សកម្ពុជាមានសមត្ថភាពប្រឡងបានមេដាយមាស៣ ប្រាក់៥គ្រឿង និងសំរឹទ្ធ៥គ្រឿង៕