នាព្រឹកថ្ងៃទី២២ ខែសីហា ឆ្នាំ២០២៦នេះ ក្រុមការងារគ្រូពេទ្យផ្នែកចក្ខុរោគ របស់មនី្ទរពេទ្យព្រះអង្គឌួង នៃក្រសួងសុខាភិបាល បានចុះពិនិត្យសុខភាពភ្នែក ផ្តល់វ៉ែនតា និងវះកាត់ ដោយឥតគិតថ្លៃ ជូនបងប្អូនប្រជាពលរដ្ឋរស់នៅក្នុងខេត្តកំពង់ចាម ស្ថិតក្នុងបរិវេណមន្ទីរពេទ្យខេត្តកំពង់ចាម។

ជាកិច្ចចាប់ផ្តើម ឯកឧត្តមសាស្ត្រាចារ្យ រង លូ លីឃាង ទីប្រឹក្សាក្រសួងសុខាភិបាល និងជានាយកមន្ទីរពេទ្យព្រះអង្គឌួង បានថ្លែងថា ថ្ងៃនេះក្រុមគ្រូពេទ្យនៃមនី្ទរពេទ្យព្រះអង្គឌួង ពិតជាមានកិតិ្តយសយ៉ាងក្រៃលែង ដែលបានចុះមកពិនិត្យសុខភាពភ្នែក ផ្តល់វ៉ែនតា និងវះកាត់ ដោយឥតគិតថ្លៃ ជូនបងប្អូនប្រជាពលរដ្ឋ។ ជាទូទៅ មន្ទីរពេទ្យព្រះអង្គឌួង តែងតែរៀបចំកម្មវិធីចុះពិនិត្យ និងព្យាបាលជំងឺភ្នែក នៅតាមមន្ទីរពេទ្យដៃគូសម្ព័ន្ធមេត្រីភាព ដូចជា៖ មន្ទីរពេទ្យខេត្តកំពត ខេត្តកែប និងខេត្តតាកែវ។ អាស្រ័យហេតុនេះ ការចុះផ្តល់សេវាថែទាំសុខភាពភ្នែកជូនដល់ពុកម៉ែបងប្អូនប្រជាពលរដ្ឋនៅពេលនេះ គឺជាឱកាសដ៏វិសេសវិសាលបំផុត។ កម្មវិធីនេះធ្វើឡើងដោយមានការឧបត្ថម្ភជាច្រើនពីមូលនិធិ Fred Hollows Foundation Cambodia និងមូលនិធិ Bloomberg (ប៊្លូមប៊ឺក) ដែលបានផ្តល់ការគាំទ្រផ្នែកបច្ចេកទេស និងថវិកា ដើម្បីធ្វើឱ្យកម្មវិធីនេះអាចប្រព្រឹត្តទៅបានដោយជោគជ័យ។ ហើយក៏សូមថ្លែងអំណរគុណយ៉ាងជ្រាលជ្រៅចំពោះអាជ្ញាធរដែនដី ជាពិសេសគណៈអភិបាលខេត្ត បានជួយជ្រោមជ្រែង ព្រមទាំងមន្ទីរសុខាភិបាល នៃរដ្ឋបាលខេត្តកំពង់ចាម និងមនី្ទរពេទ្យខេត្តកំពង់ចាម ដែលបានសហការយ៉ាងជិតស្និទ្ធក្នុងការរៀបចំកម្មវិធីដ៏មានអត្ថន័យនេះ។

ទន្ទឹមគ្នានោះដែរ លោកស្រីសាស្រ្តាចារ្យ ជុកម៉ុល កុសុម៉ា នាយិការង នៃមនី្ទរពេទ្យព្រះអង្គឌួង បានលើកឡើងថា ការមើលឃើញច្បាស់ គឺជាផ្នែកមួយដ៏សំខាន់នៃគុណភាពជីវិត។ ការដែលយើងអាចចូលរួមជួយបងប្អូនដែលមានបញ្ហាភ្នែក ឱ្យទទួលបានការពិនិត្យត្រឹមត្រូវ ទទួលបានវ៉ែនតាដែលសមស្រប ឬទទួលបានការវះកាត់នៅពេលចាំបាច់ គឺជាក្តីរីករាយ និងជាកិត្តិយសដ៏ធំធេងសម្រាប់ក្រុមការងារនៃមនី្ទរពេទ្យព្រះអង្គឌួង។

ជាមួយគ្នានោះដែរ ឯកឧត្តម ឃន ប្រុស អភិបាលរងខេត្ត តំណាងឯកឧត្តម អ៊ុន ចាន់ដា អភិបាលខេត្តកំពង់ចាម និងមនី្ទរសុខាភិបាល នៃរដ្ឋបាលខេត្តកំពង់ចាម ព្រមទាំងបងប្អូនប្រជាពលរដ្ឋ សូមសម្តែងនូវការស្វាគមន៍យ៉ាងកក់ក្តៅ និងការអរគុណយ៉ាងជ្រាលជ្រៅចំពោះឯកឧត្តមសាស្រ្តាចារ្យ រង លូ លីឃាង នាយកមនី្ទរពេទ្យព្រះអង្គឌួង និងសហការី ដែលបានសហការជាមួយមូលនិធិ Fred Hollows Foundation Cambodia ព្រមទាំងក្រុមការងារទាំងអស់ ដែលបានរៀបចំកម្មវិធីមនុស្សធម៌ដ៏មានតម្លៃនេះឡើង។ កម្មវិធីនេះ មិនត្រឹមតែផ្តល់សេវាសុខាភិបាលដោយឥតគិតថ្លៃ តែប៉ុណ្ណោះទេ។ ប៉ុន្តែថែមទាំងចូលរួមដ៏សំខាន់ ក្នុងការជួយបងប្អូនប្រជាពលរដ្ឋដែលមានបញ្ហាភ្នែក ជាពិសេសប្រជាពលរដ្ឋដែលមានជីវភាពខ្វះខាត អាចទទួលការពិនិត្យ ពិគ្រោះ ព្យាបាល និងវះកាត់ប្រកបដោយគុណភាព ដោយមិនចាំបាច់បារម្ភពីការចំណាយ។

ជាចុងក្រោយ លោក បាក់ តូក្យូ នាយកអង្គការ Fred Hollows Foundation Cambodia បានសង្កត់ធ្ងន់ថា កម្មវិធីនាថ្ងៃនេះ ពិតជាមានសារសំខាន់ និងសូមស្នើសុំអញ្ជើញលោកយាយ លោកតា បងប្អូនប្រជាពលរដ្ឋ ផ្សព្វផ្សាយព័ត៌មានទាក់ទងទៅនិងការពិនិត្យ ព្យាបាលជំងឺភ្នែកនេះ ឲ្យបានទូលំទូលាយ នៅក្នុងសហគមន៍ សូមអញ្ជើញពួកគាត់មកទទួលពិនិត្យ ព្យាបាលជំងឺភ្នែក ជាមួយនិងក្រុមគ្រូពេទ្យជំនាញឲ្យបានទៀងទាត់។ ព្រោះបើតាមការសិក្សាស្រាវជ្រាវនាពេលថ្មីៗកន្លងមកនេះ ឃើញថា ប្រជាពលរដ្ឋដែលមានពិការភ្នែក ក្នុងចំណោម១០០នាក់ គឺ៩០នាក់ ដែលអាចព្យាបាលបាន ឲ្យជាសៈស្បើយ។ ប៉ុន្តែបើពួកគាត់មកព្យាបាល មិនទាន់ពេលវេលានោះទេ ធ្វើឲ្យគាត់ធ្លាក់ខ្លួន ទៅភាពពិការភ្នែកបាន។ ដូច្នេះសូមលោកយាយ លោកតា បងប្អូន មកពិនិត្យព្យាបាលជំងឺភ្នែកជាមួយក្រុមគ្រូពេទ្យជំនាញឲ្យបានទៀងទាត់៕អត្ថបទ: រដ្ឋា