ជារាងរាល់ថ្ងៃមានប្រជាពលរដ្ឋយ៉ាងច្រើនកុះករបានធ្វើដំណើរពីទីជិតឆ្ងាយបានមកទស្សនាកម្សាន្តនៅតំបន់រមណីដ្ឋានប្រាសាទព្រហ្មកិល ដើម្បីទស្សនាប្រាសាទបុរាណខ្មែរវ័យចំណាស់មួយនេះ ដែលមានទីតាំងស្ថិតនៅឃុំជើងទៀន ស្រុកចុងកាល់ ខេត្តឧត្តរមានជ័យ។

នៅរសៀលថ្ងៃសៅរ៍ចុងសប្តាហ៍នេះ ប្រជាពលរដ្ឋមកទស្សនានៅប្រាសាទព្រហ្មកិលបានលើកឡើងថា ពីមុនមកមិនសូវមានគេស្គាល់ និងមកទស្សនាប្រាសាទបុរាណខ្មែរមួយនេះនោះទេ ដោយសារតែប្រាសាទព្រហ្មកិល ស្ថិតនៅចំកណ្តាលវាលហ៊ុំព័ទ្ធទៅដោយព្រៃរបាប់ច្រើន និងពុំមានផ្លូវចូលមកទីតាំងប្រាសាទនោះទេ។

យ៉ាងណាម៉ិញ លោក លី រដ្ឋា ដែលជាអភិបាលស្រុកចុងកាល់ បានឲ្យដឹងថា ដោយមើលឃើញពីសក្តានុពលទេសចរណ៍ និងមានការជំរុញបន្ថែមពីអភិបាលខេត្តឧត្តរមានជ័យផងនោះ អាជ្ញាធរស្រុកបានប្រមូលមូនិធិកឃុំ ធ្វើការកសាងផ្លូវក្រាលគ្រួសក្រហមមួយកខ្សែចូលមកក្នុងប្រាសាទព្រហ្មកិល ដើម្បីសម្រួលដល់បងប្អូនប្រជាពលរដ្ឋឲ្យធ្វើដំណើរមកទស្សនាលេងកម្សាន្តនៅតំបន់នេះ ឲ្យបានកាន់តែច្រើនបន្ថែមទៀត។

លោកអភិបាលស្រុកចុងកាល់ បានបន្តទៀតថា ការរៀបចំតំបន់ទេសចរណ៍ប្រាសាទព្រហ្មកិលនេះឡើង គឺអាចផ្តល់អត្តប្រយោជន៍ជួយដល់បងប្អូនប្រជាពលរដ្ឋដែលចំណាក់ស្រុកមកពីប្រទេសថៃរស់នៅក្នុងក្បែរមូលដ្ឋាននោះ អាចមានមុខរបរលក់ដូរបន្ទាប់ពីបងប្អូនធ្វើស្រែ ដើម្បីបានប្រាក់ចំណូលបន្ថែមសម្រាប់​ផ្គត់ផ្គង់ជីវភាពក្នុងក្រុមគ្រួសារបានធូរធារមួយកម្រិតទៀត។ ហើយអ្វីដែលមានការទាក់ទាញស្រូបយកនូវចំណាប់អារម្មណ៍ក្នុងមូលដ្ឋាននោះ គឺបងប្អូនអ្នក ភូមិតែងតែនាំក្រុមតន្រ្តីស្គរពក មកប្រគុំតន្រ្តីច្រៀងរាំលេងកម្សាន្ត ដើម្បីបង្កើតបរិយាកាស អបអរឲ្យមានភាពកាន់តែទាក់ទាញ និងសប្បាយរីករាយជូនដល់បងប្អូនដែលបានធ្វើដំណើរមក លេងកម្សាន្តតំបន់នេះផងដែរ៕អត្ថបទ៖ ឃិនសារិទ្ធ