ភ្នំពេញ៖ ការនាំចេញសំបកកង់រថយន្តរបស់កម្ពុជាសម្រេចបានទឹកប្រាក់ជាង ១,២០០លានដុល្លារអាមេរិក ក្នុងរយៈពេល ៧ខែឆ្នាំ២០២៦ កើនឡើង ៦៦ ភាគរយ បើធៀបនឹងឆ្នាំ២០២៥។ នេះគឺបានបង្ហាញពីកំណើនដ៏រឹងមាំ បើទោះបីជា ឧស្សាហកម្មនេះ ទើបតែបានលេចឡើងក្នុងប្រទេសកម្ពុជាក្នុងរយៈពេលប៉ុន្មានឆ្នាំចុងក្រោយនេះក៏ដោយ​។

ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យ នៃក្រសួងពាណិជ្ជកម្ម បានឱ្យដឹងថា ក្នុងរយៈពេល ៧ខែឆ្នាំ២០២៦នេះ កម្ពុជាបាននាំចេញសំបកកង់រថយន្តមានតម្លៃជាប្រាក់ចំនួន ១,២៦២ លានដុល្លារអាមេរិក កើនឡើង ៥០២ លានដុល្លារអាមេរិ ឬស្មើនឹង ៦៦,០៨ ភាគរយ បើធៀបនឹងរយៈពេលដូចគ្នាកាលពីឆ្នាំទៅ ដែលមានចំនួន ៧៦០លានដុល្លារអាមេរិក។

ឯកឧត្តម បាន​សង្កត់ធ្ងន់ថា ការកើនឡើងនៃការនាំចេញសំបកកង់រថយន្ត បាន​បង្ហាញឱ្យឃើញថា ឧស្សាហកម្មសំបកកង់រថយន្តរបស់កម្ពុជាត្រូវបានទទួលស្គាល់នៅលើទីផ្សារពិភពលោក ដែលមានចំណែកទីផ្សារប្រមាណ ៥,៩៧ ភាគរយនៃការនាំចេញសរុប។​

ចំណែក លោក គឹន ឧត្តមមុនីស៊ីណាត នាយកប្រតិបត្តិនៃក្រុមហ៊ុន PIC ដែលជាក្រុមហ៊ុនទទួលបានសិទ្ធិចែកចាយផ្តាច់មុខនូវសំបកកង់រថយន្តម៉ាក សៃលុន នៅកម្ពុជា បានបញ្ជាក់ថា ក្នុងរយៈពេល៦ខែឆ្នាំ២០២៦ ក្រុមហ៊ុនលោកបាននាំចេញសំបកកង់រថយន្តទៅកាន់ទីផ្សារអន្តរជាតិចំនួន ១៤លានគ្រាប់ កើនឡើង ៥០ភាគរយ បើធៀបនឹងរយៈពេលដូចគ្នាកាលពីឆ្នាំមុន ដែលមានចំនួន១០លានគ្រាប់។ គ្រាន់តែក្រុមហ៊ុន សៃលុន មួយបាននាំចេញសំបកកង់រថយន្ត​ សម្រេចបានទឹកប្រាក់សរុបជាង ​៦០០ លានដុល្លារអាមេរិក ដែលស្មើនឹងពាក់កណ្តាលនៃការនាំចេញសរុប។

លោក បន្ថែមទៀតថា មកដល់ពេលនេះ សំបកកង់រថយន្តផលិតដោយក្រុមហ៊ុនលោកបាននាំចេញទៅកាន់ ៨៤ ប្រទេសនៅលើពិភពលោក ក្នុងនោះ ទីផ្សារថ្មីៗ មានចំនួន ២៥ ប្រទេស រួមមាន ស៊ុយអែត (ធំជាងគេ) ប៊ុលហ្គារី ន័រវែស អេស្តូនី ដែលជាទីផ្សារចម្បងជាងគេក្នុងចំណោម ២៥ប្រទេស។ ចំណែកទីផ្សារដែលមានស្រាប់ រួមាន​ សហរដ្ឋអាមេរិក, កាណាដា,​ បារាំង, ប្រស៊ីល, អ៊ីតាលី, អូស្រាលី​, និងប្រទេសផ្សេងៗជាច្រើនទៀត។

ទិន្នន័យក្រសួងពាណិជ្ជកម្ម បង្ហាញថា កម្ពុជានាំចេញសំបកកង់បានប្រមាណ ១,៣៨០ លានដុល្លារ ក្នុងឆ្នាំ២០២៥ កើន ៥៧.៨៦% ពីប្រមាណ ៨៧៤លានដុល្លារក្នុងឆ្នាំ២០២៤។ បច្ចុប្បន្ន កម្ពុជាមានរោងចក្រផលិតសំបកកង់រថយន្តយ៉ាងតិច ៨ កំពុងប្រតិបតិការ និងបានប្រើប្រាស់ជ័រកៅស៊ូក្នុងស្រុកចំនួន ១៦០,០០០តោន ក្នុង១ឆ្នាំ ដើម្បីបំពេញខ្សែចង្វាក់ផលិតកម្មរបស់ខ្លួន៕អត្ថបទ៖ ធូ វិរៈ