ភ្នំពេញ៖ អង្គការឈរុអ៊ូសានសម្រាប់កុមារ ក្រោមការគាំទ្រពីក្រសួងអប់ យុវជន​ និង​កីឡា បានរៀបចំ «សិក្ខាសាលាចែករំលែកសមិទ្ធផលគម្រោង» និងវេទិកាដើម្បីពិនិត្យសមិទ្ធផល និងពិភាក្សាអំពីទិសដៅពង្រឹងប្រព័ន្ធអប់រំកម្ពុជាឆ្ពោះទៅឆ្នាំ២០៣០។

ក្នុងសិក្ខាសាលានេះ លោក Jaekyun Rho នាយកប្រចាំប្រទេសនៃអង្គការឈរុអ៊ូសានសម្រាប់កុមារ បានលើកឡើងថា ការប្រែក្លាយចក្ខុវិស័យអប់រំឱ្យក្លាយជាការពិត ត្រូវការភាពជាដៃគូដ៏រឹងមាំ និងការប្តេជ្ញាចិត្តជាបន្តបន្ទាប់ ដើម្បីគាំទ្រសិស្សានុសិស្សគ្រប់ដំណាក់កាលនៃការសិក្សា ចាប់ពីការអប់រំកុមារតូច រហូតដល់ការសិក្សាមូលដ្ឋាន។

ក្នុងសុន្ទរកថាបើកកម្មវិធី លោក អ៊ុង ជិនណា អគ្គនាយកនៃអគ្គនាយកដ្ឋានអប់រំ នៃក្រសួងអប់រំ យុវជន និងកីឡា បានគូសបញ្ជាក់ពីសារៈសំខាន់នៃភាពជាដៃគូពហុវិស័យ ក្នុងការជំរុញការសម្រេចបាននូវគោលដៅអប់រំជាតិ។

លោកបានបញ្ជាក់ថា កម្ពុជាសម្រេចបានវឌ្ឍនភាពគួរឱ្យកត់សម្គាល់ ក្នុងការពង្រីកលទ្ធភាពទទួលបានការអប់រំ និងលើកកម្ពស់គុណភាពសិក្សា ខណៈក្រសួងនៅតែបន្តផ្តល់អាទិភាពលើសមធម៌ លទ្ធផលសិក្សាប្រកបដោយគុណភាព អក្ខរកម្មមូលដ្ឋាន និងបរិវត្តកម្មឌីជីថល។

លោកក៏បានលើកឡើងថា ការអប់រំគឺជាដំណើរការរៀនសូត្រជាបន្តបន្ទាប់ មិនមែនបញ្ចប់ត្រឹមលទ្ធផលរយៈពេលខ្លីនោះទេ។ ដូច្នេះ ភាគីពាក់ព័ន្ធគួរពិនិត្យសមិទ្ធផលគម្រោងដោយផ្អែកលើភស្តុតាង មេរៀនបទពិសោធន៍ និរន្តរភាព និងការរួមចំណែកជាក់ស្តែងដល់ប្រព័ន្ធអប់រំទាំងមូល។

លោក អ៊ុ ច័ន្ទតារា អនុប្រធាននាយកដ្ឋានបរិវត្តកម្មឌីជីថល បានពិភាក្សាអំពីលក្ខខណ្ឌចាំបាច់នៅកម្រិតសាលារៀន និងកម្រិតគោលនយោបាយ សម្រាប់ពង្រីកកម្មវិធីសាកល្បងឌីជីថលដែលទទួលបានជោគជ័យឱ្យអនុវត្តទូទាំងប្រទេស។

លោកបានលើកឡើងពីសក្តានុពលនៃការបញ្ចូលឧបករណ៍ឌីជីថលដែលបង្កើតឡើងក្នុងស្រុកដោយអង្គការមិនមែនរដ្ឋាភិបាល ទៅក្នុងកម្មវិធីសិក្សាស្តង់ដារ។ ជាក់ស្តែង គម្រោងលើកកម្ពស់ការអប់រំឌីជីថលសម្រាប់សិស្សានុសិស្ស (IDEAL) ដែលអនុវត្តដោយអង្គការសកម្មភាពសម្រាប់ការអប់រំនៅកម្ពុជា (KAPE) នៅសាលារៀនចំនួន១២ បានគាំទ្រកុមារប្រមាណ៩,០០០នាក់។

ជាមួយគ្នានេះ សាស្ត្រាចារ្យ Park Hwanbo មកពីសាកលវិទ្យាល័យជាតិ Chungnam នៃសាធារណរដ្ឋកូរ៉េ បានបង្ហាញអំពីកត្តាផ្អែកលើភស្តុតាង ដែលអាចធានានិរន្តរភាពរយៈពេលវែង ដោយផ្អែកលើបទពិសោធន៍ពីគម្រោងបង្កើនសមត្ថភាពឌីជីថលក្នុងវិស័យអប់រំ (IDCE) ដែលអនុវត្តដោយ ChildFund Cambodia និងទទួលបានការគាំទ្រពីអង្គការឈរុអ៊ូសានសម្រាប់កុមារ ចាប់ពីឆ្នាំ២០២៣ ដល់ឆ្នាំ២០២៥ ។

ក្រៅពីការអប់រំឌីជីថល សិក្ខាសាលាក៏បានផ្តោតលើសារៈសំខាន់នៃការអភិវឌ្ឍកុមារតូច និងការសិក្សាមូលដ្ឋាន ដែលជាមូលដ្ឋានគ្រឹះសម្រាប់ការសិក្សារបស់កុមារនាពេលអនាគត។

ការពិភាក្សានេះបានយកបទពិសោធន៍ពីគម្រោងអភិវឌ្ឍន៍កុមារតំបន់បឹងត្របែក (BT-CDP) ដែលទើបដាក់ឱ្យដំណើរការដោយ CUFC និងបានបង្កើតមជ្ឈមណ្ឌលអភិវឌ្ឍន៍កុមារមួយកន្លែង ដែលផ្តល់អត្ថប្រយោជន៍ដល់កុមារចំនួន៣២០នាក់។ ក៏ដូចជាគម្រោងងាយស្រួលរៀន (E2L) ដំណាក់កាលទី៣ ដែលទទួលបានហិរញ្ញប្បទានពី KOICA និងអនុវត្តនៅសាលារៀនចំនួន១៧ ដោយផ្តល់អត្ថប្រយោជន៍ដល់កុមារចំនួន៦,០២០នាក់។

គម្រោងទាំងនេះបានបង្ហាញថា ការវិនិយោគជាយុទ្ធសាស្ត្រលើការត្រៀមខ្លួនចូលរៀនរបស់កុមារ អាចជួយពង្រឹង និងរក្សាលទ្ធផលសិក្សាផ្នែកអក្ខរកម្ម និងគណិតវិទ្យាជាមូលដ្ឋានប្រកបដោយប្រសិទ្ធភាព។

លោកស្រី Kyungah Kristy Bang អនុប្រធានស្ថាប័ន GPE បានពិភាក្សាអំពីរបៀបដែលក្របខណ្ឌភាពជាដៃគូសកល អាចបំពេញបន្ថែមអាទិភាពអប់រំរបស់កម្ពុជាប្រកបដោយប្រសិទ្ធភាព ព្រមទាំងពង្រឹងកិច្ចសហការរវាងក្រសួងអប់រំ យុវជន និងកីឡា អង្គការមិនមែនរដ្ឋាភិបាល និងដៃគូអភិវឌ្ឍន៍។

ជាលទ្ធផល សិក្ខាសាលាបានបង្ហាញពីការប្តេជ្ញាចិត្តរួមគ្នារបស់រាជរដ្ឋាភិបាល អង្គការមិនមែនរដ្ឋាភិបាល និងដៃគូអភិវឌ្ឍន៍ ក្នុងការរួមចំណែកសម្រេចបាននូវផែនការយុទ្ធសាស្ត្រអប់រំឆ្ពោះទៅឆ្នាំ២០៣០ និងធានាឱ្យកុមារគ្រប់រូបនៅកម្ពុជា ទទួលបានការអប់រំប្រកបដោយគុណភាព និងសមធម៌ ដើម្បីអាចចូលរួមចំណែកដល់ការអភិវឌ្ឍប្រទេសជាតិនាពេលអនាគត៕ អត្ថបទ​បាន សុខរិទ្ធិ