សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាក្រកម្ពុជា បានណែនាំអាជ្ញាធរគ្រប់លំដាប់ថ្នាក់ទាំងអស់ ត្រៀមអន្តរាគមន៍ជួយពលរដ្ឋ ខណៈទឹកជំនន់ឆ្នាំនេះនឹងហក់ឡើងខ្ពស់រហូតដល់ការប្រកាសអាសន្ន។

ក្នុងឱកាសអញ្ជើញជាអធិបតីក្នុងពិធីសម្ពោធកំណាត់ផ្លូវបីខ្សែ ប្រវែងជាង៩៨.គីឡូម៉ែត នៅខេត្តក្រចេះ នាព្រឹកថ្ងៃទី២៥ ខែសីហា នេះ សម្តេចធិបតី ហ៊ុន ម៉ាណែត បានលើកឡើងថា ឆ្នាំនេះ ទឹកជំនន់នឹងហក់ឡើងខ្ពស់រហូតដល់ប្រកាសអាសន្ន ដូច្នេះអាជ្ញាធរ និងកងកម្លាំងទាំងអស់ត្រូវត្រៀមលក្ខណៈឲ្យបានគ្រប់គ្រាន់ ដើម្បីចុះជួយអន្តរាគមន៍ពលរដ្ឋ ដែលអាចរងគ្រោះដោយសារបញ្ហាទឹកជំនន់នេះ។

សម្ដេចធិបតី បានបញ្ជាក់ថា (ឥឡូវទឹកជំនន់ឡើងច្រើន ឆ្នាំនេះ ទឹកទន្លេមេង្គឡើងខ្ពស់ដូច្នេះខេត្ត ទាំងអស់ជាប់ដងទន្លេ ត្រូវតែគិតគូរចំពោះអាទិភាពជីវិតរបស់ប្រជាជនប្រសិនបើទឹកលិចយូរ ដូច្នេះកងកម្លាំងប្រដាប់អាវុធគ្រប់ប្រភេទត្រៀមកម្លាំងដើម្បីជួយ) ។

យោងតាមក្រសួងធនធានទឹក និងឧតុនិយម ដោយសារស្ថានភាពអាកាសធាតុ បាននិងកំពុងមានការប្រែប្រួលដែលកើតឡើងដោយសារឥទ្ធិពលរបស់ព្យុះ១៨ ឈ្មោះ សូដេល និងប្រព័ន្ធសម្ពាធទាបដែលកើតមាននៅភាគខាងលើអាងទន្លេមេគង្គ បណ្តាលឲ្យតំបន់ផ្ទៃរងទឹកភ្លៀង នៃទន្លេមេគង្គក្នុងប្រទេសថៃ ប្រទេសឡាវ ប្រទេសវៀតណាម និងប្រទេសកម្ពុជា មានភ្លៀងធ្លាក់ច្រើន នៅក្នុងអាងទន្លេមេគង្គ។ ដោយមើលឃើញទឹកជំនន់នឹងហក់ឡើងនោះ ក្រសួងធនធានទឹក បានអំពាវនាវឲ្យប្រជាពលរដ្ឋនៅខេត្តស្ទឹងត្រែង ក្រចេះ ត្បូងឃ្មុំ និងខេត្តកំពង់ចាម មានការប្រុងប្រយ័ត្នខ្ពស់ផងដែរ៕ អត្ថបទ៖ បាន ចក់