ភ្នំពេញ៖ ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានអំពាវនាវដល់ប្រជាពលរដ្ឋមានបញ្ហាបាត់ ឬខូចអត្តសញ្ញាណប័ណ្ណ​ អាចស្នើ​តាម​រយៈគណៈកម្មការឃុំ-សង្កាត់រៀបចំការបោះឆ្នោត ដើម្បីប្រើប្រាស់សម្រាប់ការបោះឆ្នោតឃុំ-សង្កាត់ខាងមុខ។

ថ្លែងប្រាប់BTV News ឯកឧត្តម ហង្ស ពុទ្ធា បានឲ្យដឹងថា ក្នុងពេល​បច្ចុប្បន្ន​នេះ ​គណៈកម្មការឃុំ សង្កាត់រៀបចំការបោះឆ្នោត (គឃ.សប) ទូទាំងប្រទេស បានបិទផ្សាយជាសាធារណៈនូវបញ្ជី​បោះឆ្នោត​ផ្លូវការឆ្នាំ២០២១ ​នៅទីស្នាក់ការរបស់ខ្លួន សម្រាប់បម្រើឱ្យការបោះឆ្នោតជ្រើសរើស​ក្រុម​ប្រឹក្សាឃុំ-សង្កាត់ អាណត្តិទី៥ ដែលនឹងប្រព្រឹត្តទៅនៅថ្ងៃទី៥ ​ខែមិថុនា ខាងមុខ។

ឯកឧត្តម ហង្ស ពុទ្ធា បន្តថា ជានីតិវិធីក្នុងករណីប្រជាពលរដ្ឋដែលនឹងចូលរួមការបោះឆ្នោត តាម​រយៈការ​ប្រើប្រាស់​អត្តសញ្ញាប័ណ្ណនោះ​ មានបញ្ហាខូច ឬមិនអាចបម្រើសម្រាប់ការបោះឆ្នោត​អាច​ស្នើ​ទៅគណៈកម្មការឃុំ-សង្កាត់រៀបចំការបោះឆ្នោត ដើម្បីទទួលឯកសារបញ្ជាក់ព័ត៌មានរបស់ខ្លួន។

ទន្ទឹមគ្នានេះ ឯកឧត្តម ហង្ស ពុទ្ធា បានអំពាវនាវដល់ប្រជាពលរដ្ឋដែលជួបបញ្ហាបាត់ ឬខូច​អត្តសញ្ញាណប័ណ្ណ អាចស្នើទៅគណៈកម្មការឃុំ-សង្កាត់រៀបចំការបោះឆ្នោត ឬអាជ្ញាធរ​តាម​សាលាឃុំ-សង្កាត់ ដើម្បីទទួលបានឯកសារបញ្ជាក់សម្រាប់បម្រើការបោះឆ្នោតនាពេលខាងមុខ។

លោក ប៉ែន សារឿន ចៅសង្កាត់ផ្សារថ្មីទី១ បានឲ្យដឹងថា គិតមកទល់ពេលនេះ មានប្រជាពលរដ្ឋ​ក្នុង​សង្កាត់របស់ខ្លួនចំនួន២៦នាក់ មានអត្តសញ្ញាណប័ណ្ណហួសសុពលភាព ​ខណៈអាជ្ញាធរកំពុង​ជំរុញ​ប្រជាពលរដ្ឋ​ទៅ​ស្នើពីគណៈកម្មការឃុំ-សង្កាត់​រៀបចំការបោះឆ្នោត ដើម្បីឲ្យសាលា​សង្កាត់ឬឃុំ ​បញ្ជាក់លើ​ឯកសារជាប្រជាពលរដ្ឋរស់នៅក្នុងមូលដ្ឋាន។

សូមជម្រាបជូនថា ដើម្បីបោះឆ្នោតបានប្រជាពលរដ្ឋត្រូវមានឈ្មោះក្នុងបញ្ជីបោះឆ្នោតផ្លូវការ ឆ្នាំ២០២១ ​និងមានអត្តសញ្ញាណប័ណ្ណសញ្ជាតិខ្មែរ (អ.ខ)​ ដែលមានសុពលភាព។

ប្រសិនបើប្រជាពលរដ្ឋមិនទាន់មាន អត្តសញ្ញាណប័ណ្ណសញ្ជាតិខ្មែរ ខូច​ អស់សុពលភាព ​បាត់ ឬកែតម្រូវ ​សាមីខ្លួនអាចស្នើសុំឯកសារបញ្ជាក់អត្តសញ្ញាណបម្រើឱ្យការបោះឆ្នោតពី គណៈកម្មការ​ឃុំ សង្កាត់រៀបចំការបោះឆ្នោត និងអាជ្ញាធរឃុំ សង្កាត់ នៃឃុំ សង្កាត់ដែល​ខ្លួនត្រូវបោះឆ្នោត ដើម្បី​យកទៅប្រើប្រាស់នៅថ្ងៃបោះឆ្នោត ​ខណៈការស្នើសុំនេះមានរយៈពេល៣០ថ្ងៃ ​ចាប់ពីថ្ងៃទី៥ ខែឧសភា​ រហូតដល់ថ្ងៃទី៣​ ខែមិថុនា ឆ្នាំ២០២២៕ អត្ថបទ៖ សេក ឧត្តម