​​បាល់បោះ​៖ ​កីឡាករ​បាល់បោះ​អាមេរិក Stephen Curry បាន​ក្លាយជា​តួឯក​ក្នុងការ​ប្រកួត​ ក្រោយ​បោះ​បញ្ចូល​កន្ត្រក​នាទីចុងក្រោយ​ឱ្យ Golden State Warriors វាយបក​ពីក្រោយ​យកឈ្នះ Memphis Grizzlies ១០១-៩៨ ដើម្បី​នាំមុខ​ក្នុង Series ៣-១ នៃ​វគ្គ Play-Off ពាក់កណ្តាល​ផ្តាច់ព្រ័ត្រ​ក្របខណ្ឌ​អាមេរិក NBA​។

​​Stephen Curry បោះ​បាន​សរុប ៣២ពិន្ទុ​ក្នុងការ​ប្រកួត​នេះ​បូក​រួមទាំង​ការបោះ​យក​ ៣​ពិន្ទុ​នៅ​នាទីចុងក្រោយ​ធ្វើឱ្យ Golden State ត្រូវការ​ជ័យជំនះ​តែ ១​ប្រកួត​ទៀត​ដើម្បី​ឡើង​វគ្គ​ផ្តាច់ព្រ័ត្រ​នៅ​ភាគ​ខាងលិច​។ ​ចំណែក Memphis Grizzlies ថ្វីបើ​គ្មាន​កីឡាករ​សំខាន់ Ja Morant ក៏ដោយ​ក៏បាន​បង្ក​ការលំបាក​ដល់ Golden State ដែរ​បន្ទាប់ពី​ការនាំ​មុខ ១២ពិន្ទុ​ពេល​ចាប់​ផ្តើមដំបូង​។ ​ព្រឹក​ថ្ងៃ​ព្រហស្បតិ៍​ស្អែក​នេះ Golden State នឹងត្រូវ​ត្រលប់​ទៅកាន់​ទឹកដី Memphis Grizzlies វិញ​ដើម្បី​ស្វែងរក​កៅអី​វគ្គ​ផ្តាច់ព្រ័ត្រ​លើក​ទី៦ ក្នុង ៨ឆ្នាំ​ចុងក្រោយ​។ ​ដោយឡែក​ការប្រកួត​នៅ​ភាគ​ខាងកើត​ឯណោះ​វិញ Boston Celtics បាន​យកឈ្នះ​ក្រុម​ការពារ​តំណែង​ជើងឯក Milwaukee Bucks ១១៦-១០៨ ដើម្បី​តាម​ស្មើ​ក្នុង Series ២-២​។

​​កីឡាករ​សំខាន់​របស់ Celtics, Al Horford បោះ​បាន ៣០ពិន្ទុ​ម្នាក់ឯង​ក្នុង​ជ័យជំនះ​ដ៏​មាន​សារៈសំខាន់​នេះ ​ពោលគឺ Boston Celtics បាន​វាយបក​ពី​ការ​នាំមុខ ១១ពិន្ទុ​របស់ Milwaukee Bucks​។ ​Jayson Tatum ក៏​បោះ​បាន ៣០ពិន្ទុ​ផង​ដែរ​ឱ្យ Boston Celtics ខណៈដែល​កីឡាករ​ក្រិ​ក Giannis Antetokounmpo បោះ​បាន ៣៤ពិន្ទុ​ម្នាក់ឯង និង ១៨បាល់​រី​បោ​ន​នៅតែ​មិន​គ្រប់គ្រាន់​ជួយ Milwaukee Bucks គេច​ពី​បរាជ័យ​បាន​។ ​ក្រុម​ទាំងពីរ​នឹង​ជួបគ្នា​ប្រកួត​ទី៥ ក្នុង Series ៧ប្រកួត​នៅ​ព្រឹក​ថ្ងៃ​ព្រហស្បតិ៍​ស្អែក​នេះ​៕

​អត្ថបទ​៖​នាង សុភា​វុ​ធ