សៀមរាប៖ អគារទីស្នាក់ការគណបក្សប្រជាជនកម្ពុជាមួយខ្នង នៅឃុំពាក់ស្នែង ស្រុកអង្គរធំ ខេត្ដសៀមរាប ដែលជាអំណោយសម្ដេចពិជ័យសេនា ទៀ បាញ់ ត្រូវបានបើកសម្ពោធដាក់ឱ្យប្រើប្រាស់ជាផ្លូវការ កាលពីថ្ងៃទី១០ ខែឧសភានេះ។

ឯកឧត្ដម ខៀវ ឆេន ប្រធានក្រុមការងារថ្នាក់កណ្ដាលចុះមូលដ្ឋានឃុំពាក់ស្នែង ខេត្ដសៀមរាប បានលើកឡើងថា ទីស្នាក់ការគណបក្សនេះ ត្រូវបានកសាងឡើងបំពេញសេចក្តីត្រូវការរបស់​សមាជិក សមាជិកាគណបក្ស តាមរយៈក្រុមការងារ ដើម្បីបន្តពង្រឹងចលនាគណបក្ស ក្នុង​បុព្វហេតុ​បម្រើជាតិ និងប្រជាជន ​សំដៅ​ចូលរួមអភិវឌ្ឍន៍​សង្គម សេដ្ឋកិច្ចជាតិ​ ឱ្យកាន់តែរីកចម្រើនថែមទៀត ក្រោមការដឹកនាំ​ប្រកប​ដោយ​គតិបណ្ឌិតរបស់សម្តេចតេជោ ហ៊ុន សែន ប្រធានគណបក្សប្រជាជន​កម្ពុជា។

នៅក្នុងពិធីនេះ គណៈកម្មាធិការគណបក្សឃុំ ប្រធានភូមិ ប្រធានសាខា អនុសាខា សមាជិកបក្ស​ឃុំពាក់ស្នែងទាំងអស់ ​បានប្តេជ្ញាចិត្តចំពោះគណបក្សប្រជាជនកម្ពុជា ​បន្តគាំទ្រ និងបោះឆ្នោតជ្រើស​រើសក្រុមប្រឹក្សាឃុំសង្កាត់អណត្តិទី៥ ឆ្នាំ២០២២ ​នៅថ្ងៃទី៥ ខែមិថុនា ​ឆ្នាំ២០២២ ឱ្យទទួលជ័យជម្នះ ដើម្បីបន្តដឹកនាំកសាង ​និងអភិវឌ្ឍសង្គមជាតិ ​ឱ្យរីកចម្រើនរុងរឿង ​ជារៀងរហូតតទៅ។

ឧត្តមប្រធានក្រុមការងារ បានជំរុញឱ្យក្រុមការងារគណៈកម្មាធិការ​គណបក្សមូលដ្ឋានគ្រប់ថ្នាក់ គ្រប់ផ្នែក ​និងភាគីពាក់ព័ន្ធទាំងអស់ បន្តខិតខំប្រឹងប្រែងបំពេញការងារឱ្យកាន់​តែសកម្មទ្វេដង​ថែម​ទៀត តាមរយៈការចុះមូលដ្ឋានជួបសំណេះសំណាលជាមួយសមាជិកបក្សតាមខ្នងផ្ទះ ដើម្បី​ទទួល​បានព័ត៌មានពិត ​សំដៅចូលរួមដោះស្រាយសំណើ ​សំណូមពរ ​និងបញ្ហាផ្សេងៗ ដែលជាកង្វល់របស់ប្រជាពលរដ្ឋ៕អត្ថបទ៖ ឈិត សាវី