បាត់ដំបង៖ លោក ខៃ សុដា ប្រធានមន្ទីរធនធានទឹក និងឧតុនិយមខេត្តបាត់ដំបង បានបញ្ជាក់ពីមូលហេតុនៃការហក់ឡើងកម្ពស់ទឹកស្ទឹងសង្កែ និងអំពាវនាវឱ្យបងប្អូនប្រជាពលរដ្ឋរស់នៅតាមបណ្តោយស្ទឹងសង្កែ ពិសេសអ្នកស្រុកឯកភ្នំបង្កើនការប្រុងប្រយ័ត្នខ្ពស់។

លោក ខៃ សុដា បានឱ្យដឹងនៅថ្ងៃទី៣១ ខែសីហា ឆ្នាំ២០២៦នេះថា ទឹកជំនន់ស្ទឹងសង្កែបានមកពីប្រភពពីរគឺ ស្ទឹងគ្រញូង និងស្ទឹងបរឡាងនៃស្រុកសំឡូត។ការហក់ឡើងកម្ពស់ទឹកស្ទឹងសង្កែដោយសារនៅថ្ងៃទី២៨ដល់ថ្ងៃទី២៩ ខែសីហា ឆ្នាំ២០២៦មានភ្លៀងធ្លាក់ខ្លាំងនៅផ្នែកខាងលើនៃស្រុកសំឡូតហើយទឹកបានហូរចូលអាងសេកសកហួសសមត្ថភាពស្តុកទើបតម្រូវឱ្យបើកទ្វារទឹកចូលស្ទឹងសង្កែ។

លោក ខៃ សុដា បញ្ជាក់បន្ថែមថា ការហក់ឡើងនៃកម្ពស់ទឹកស្ទឹងសង្កែបណ្ដាលឱ្យមានការលិចលង់នៅតំបន់ខ្លះៗនៅស្រុកឯកភ្នំ។

លោកប្រធានមន្ទីរ បានសង្កត់ធ្ងន់ថា នៅថ្ងៃទី៣១ ខែសីហា ឆ្នាំ២០២៦នេះ កម្ពស់ទឹកនៅផ្នែកខាងលើនៃស្រុកសំឡូតបានស្រកអស់ ហើយទ្វារទឹកអាងសេកសកត្រូវបានបិទបន្តិចម្តងៗនៅសល់ហូរតិចតួច។តាមស្ថានភាពនេះទឹកនៅផ្នែកខាងក្រោមនឹងស្រកជាបន្តបន្ទាប់នៅល្ងាចនេះ ឬថ្ងៃស្អែក។ទោះជាយ៉ាងណាលោកនៅតែអំពាវនាវឱ្យប្រជាពលរដ្ឋនៅផ្នែកខាងក្រោមក្នុងភូមិសាស្រ្តស្រុកឯកភ្នំបន្តប្រុងប្រយ័ត្នខ្ពស់។

ពាក់ព័ន្ធនឹងស្ថានភាពនៃកើនឡើងកម្ពស់ទឹកស្ទឹងសង្កែនេះ អាជ្ញាធរក្រុង ស្រុក នៅតាមបណ្ដោយដងស្ទឹងសង្កែ ជាពិសេសស្រុកឯកភ្នំដែលជាស្រុកនៅផ្នែកខាងក្រោម បានចេញសេចក្ដីជូនដំណឹងសូមឱ្យបងប្អូនប្រជាពលរដ្ឋរស់នៅតាមបណ្ដោយដងស្ទឹងមានការប្រុងប្រយ័ត្នខ្ពស់ចំពោះកុមារ និងសម្ភារៈផ្សេងៗជាដើម៕